Penalty hmangin Services champion

Nimin khan Ludhia­na, Punjab-ah Santosh Trophy final khelh a ni a, goal inpe loa an inhneh­tawk hnuah Services chuan penalty shootout-ah a thlengtu Punjab chu 5-4 in an hneh a, a vawi lina atan an champion.

Services hian semi final-ah Kerala chu hun pangngaiah an draw a, extra time-ah 3-0 in an hneh. Punjab hian semi final-ah Mizoram chu penalty shoot out-ah 10-9 in an hneh ve thung - final an luhna kawngah minute 90 chhunga chak zo lo ve ve an ni.

Nimina final khelhah hian hun pangngaiah goal an thun lo a, minute 90 chhungin chak zawk an awm lo. Hun pek belhah pawh goal a la lut lo cheu a, penalty shootout hmanga chak zawk zawn a ngai.

Punjab player pa­khat­in a pet goal lo a, Services-in an thun vek a, 5-4 in an chak ta a ni. Punjab leh Mizoram semi final khelh khan Punjab lamin an hlah hmasa a, Mizoramin an penalty vawi ngana pet goal se chak thei an ni a, an pet goal lo hlauh a ni. Kum 2013 khan Services hi Santosh Trophy-ah an champion a, kum 2014-ah Mizoram champion-in he mi ṭum hian group match-ah Mizoramin 4-1 in an hneh a, kum 2015-ah Services bawk an champion leh ta.

Services-ah hian Mizo pahnih Ramniengmawia, Ramthar Veng leh Fran­cis Zonuntluanga, Durtlang Leitan-te an khel a ni.

Zirtawpnia Mizoram leh Punjab-in semi final an khelh khan Mizoramin corner vawi 15 zet an hmu a, hei hian an nawr nasatzia a lang a; nimah­sela Punjab hian an goal an veng thiam tlat a, extra time-ah an thun thei chauh a ni. Nimina final-ah pawh Services hian Punjab lamah hian an thun thei lo a, minute 120 chhungin 0-0 a ni a, penalty shootout-ah Punjab hi an vannei tlang thei ta lo a ni.