Sherwood-a hnuaiah harhtharna
Aston Villa-in manager thar Tim Sherwood-a hnuaiah hartharna an chang chhunzawm a, Inrinni zan khan Sunderland 4-0 in an sawp.
Villa tan Gabriel Agbonlahor leh Christian Benteke te'n goal hnih ve ve an khung a, December thla hnua khualmuala an chakna hmasa ber a ni.
Chak zo lo Sunderland hi table-ah 17-naah an awm mek a, supporter lungawi loin manager Gus Poyet an au el nasa hle. Inkhelh banah Poyet chuan fan-te lungawi lohna chu a hriatthiam pui thu a sawi bakah amah vanga chak lo an nih thu a sawi bawk.
Inkhel dangah Crystal Palace-in Wilfried Zaha, James Mc Arthur leh Joel Ward te goal hmangin QPR 3-1 in an hneh a, mikhual team goal awm chhun Matt Phillips-a khung hian inkhel result ti danglam lo mah se goal ropui a ni.
Table mawngphaha awm Leicester City-in tam zawkna an nihna an hmang ṭankai thei lo a, Hull City midfielder Tom Huddlestone chu minute 72-naah hnawhchhuah a ni mah se goal awm loin an inhnehtawk.
West Brom-in Brown Ideye goal hmangin Stoke City 1-0 in an hneh. West Brom hian tun hmain an khelmual Hawthorns-ah Stoke hi Premier League-ah an la hneh ngai lo a, an vawi khat hnehna a ni.