MPSC-ah qualification a awm lo Chairman pian kum ziah dan a inang lo
Mizoram Public Service Commission secretary Tamlal Lohar chuan, MPSC chairman leh member ni turin tehfungah zirna lama thiamna (educational qualification) ngai a inziak lo tih a sawi. Hetih lai hian, tun hnaia MPSC chairman atana ruat Andrew Lalherliana chu a document ṭhenkhata a pian kum a inang lo.
Vanglaini palai zawhna chhangin Tamlal Lohar chuan, MPSC chairman leh member-ah sorkarin a duh duh a ruat thei niin a sawi a, "A duh chuan peon pawh member-ah a dah thei," a ti a; MPSC kalphung a felfai avangin mi tu pawh chairman leh member-ah awm se, kawngro a su thei lo niin a sawi.
Tamlal Lohar chuan, MPSC chairman leh member tur chu mi hmingṭha, mipuiin an rin leh mi dik an nih a ngai tih sawiin, sorkarin MPSC chairman atan Andrew Lalherliana chu ṭhaa a hriat avangin a ruat ni maia a ngaih thu a sawi a, "MPSC kalphung hi a ṭha a, a felfai avangin páwn lam aṭanga thunun theih a ni tawh lo. Member-ah politician emaw, sakhaw rawngbawltu an ni emaw, sorkar hnathawk pawh ni se, member an ni thei vek," a ti.
MPSC secretary chuan, MPSC chu chairman nei loin a lo awm fo thu leh, chairman leh member awm lo pawhin hna an thawh theih thu a sawi a, "Mahse tunah chuan member an la awm loh avangin interview erawh tih a rem rih lo," a ti.
MPSC chairman ruat dan sawiin Tamlal Lohar chuan, "Kum ruk chhung atan a ni a, kum 62 an tlin erawh chuan an term an chelh zo kher tur tihna a ni lo a, an chhuahsan tho a ngai. Kum 62 an tlin hman loh chuan kum 6 chhung an thawk tur a ni," a ti. Chairman ni lai, Andrew Lalherliana chu October 7, 2015-ah kum kum 62 a tlin dawn avangin a chhuah a ngai dawn tih a sawi.
Hetih lai hian, MPSC chairman Andrew Lalherliana chu document ṭhenkhatah kum 1951-a piang anga a inziah laiin, document dangah kum 1953-a piang angin a inziak a; kum 1951-a piang a nih chuan kum 62 a pel tawh tihna a ni a, kum 1953-a piang a nih erawh chuan kum 62 a la pumhlûm lo thei thung.
Andrew Lalherliana hian Khawzawl bial aṭanga MLA atan a thlantlin a nih laia Assembly House-a MLA bio-data an ziahna buah chuan October 7, 1951-a piang anga ziah a ni a; kum 2008-a Assembly inthlana a affidavit-ah pawh kum 57 (1951-a piang tihna) angin a inziak a ni. Kum 2003-a Assembly inthlanah erawh chuan kum 45-in a inziak thung. MPSC website-a a chanchin tawi ziahnaah chuan October 7, 1953-a piang anga tarlan a ni.
Andrew Lalherliana pian kum chungchangah hian MPSC secretary chuan nimin khan thuchhuah a siam. Andrew Lalherliana chu a document zawng zawngah a pian kum October 7, 1953 tih vek a nih thu a tarlang a, "Amaherawhchu, kum 2003 MLA election-ah a
ṭhiante MLA nomination form a fill-up tirah October 7, 1951 tiin an lo ziahsak a, an lo thehluh tawh avangin kum 2008 thleng a pu a, remchang hmasa ber 2008/2009 khan Assembly identity card-ah siam diktir a ni," a ti.