Russia hremna an kaltlangpui dawn Olympic leh World Cup a nghawng!

Infiamna lama thubuai ngaih-tuahtu sang ber Court of Arbitration for Sport (CAS) chuan Russia chungchanga a thutlukna a puang a, kum li chhunga hrem an nihna chu kum hnih atan a tih tawisak - hrem an nihna erawh a hlip chuang lo.

Tokyo Olympic 2020 leh FIFA World Cup 2020 te chu hremna hian a huap tel dawn a, infiamna khawmpui lianah hian Russia hmingin an tel thei dawn lo; Russia ram hnam puanzar (flag) pawh pharh a ni dawn lo a, an hnam hla (anthem) pawh tihrik (play) a ni ve lo ang.

Hrem an nihna hi kum 2022 December 16-ah a tawp dawn chauh a, hetih hun chhung hian Russia ramah khawvel huap infiamna lian a thleng thei dawn lo bawk. Russian tan chanchin lungchhiat thlak a ni a, chutih rualin kum li hrem tur kha kum hnih atan an tih tawi erawh lawmna tur a ni.

Euro 2020 atan erawh Russia hi an inlan phalsak an ni. European Championhsip hi kumina neih tur ni mah se coronavirus vangin nakkum atan sawn a ni a, jersey sen ha chungin Russia an inlan thei dawn.

CAS chuan, "Infiamna huangah hian dan bawhchhiatna leh thil tih sual palh a thleng ve ṭhin. Khawvel huapa infiamna a thianghlim zel kan duh. Tun dinhmun chauh ngaithuah theih a ni lo a, ṭhangthar lo kal zel tur ten dan zawm pawimawh zia an hriat nan hremna kaltlangpui a ni," an ti.

Infiammiten damdawi hman phal loh an hmang em tih endiktu WADA president Witold Banka chuan, "Keini lam chuan dan bawh chhia chu hremna na thei ang ber pek zel kan duh a, tun hma aṭanga kan kalphung pawh a ni.

"Russia pawh hi kum li chhung atan hrem kha kan duhdan a ni, amaherawhchu an chungchang ngaihtuahtu lamin thutlukna an siam hi kan zah a ngai," a ti. WADA hian kum li hrem turin an ngen chu CAS lamin a chanveah a tih tlemsak.

Russia hian 2014 Sochi Winter Games-ah khan an ram sorkar hriatpuina in an infiammite chuan dan an bawh chhia. An thil tih sual avang hian hrem an ni, Rio Olympic-ah pawh khan an ram hming an tel thei lo hial.

WADA chuan Russia chung-chang hi a chhui chiang a, an thil chhui chu Russia lamin an pui ṭha tawk lo. Heng bakah hian zun leh thisen endik tura an dahna hmunte chu an ti chhe lui niin an sawi, hei vang hian hremna nasa zawk an pe.

World Athletic chuan Russian infiammite hi a lo hrem lailawk tawh bawk a, a hrem chhunzawm dan tur chu nakkumah an ngaihtuah leh ang. Russia thil tih dan hi ram hrang hrangin an dem a, a demtu langsra ber chu US leh UK Anti-Doping Agency an ni.

Russia Anti Doping Agency (RUSADA) lam chuan tun thlengin an puhna hi an la pha, endikna tur leh endik tur tih chhiat an la neih loh thu an sawi reng. Mahse CAS berin thutlukna a siam tak avangin beisei tur dang a awm tawh lo ang.

Rio Olympic leh 2018 Winter Olympic-ah khan Russian infiam-mite chu 'neutral flag' hnuaiah an lo inlan tawh. Mimala inelna hmachawn tur pawh hian endikna khauh leh khirh tak an paltlang hmasak a ngai a ni.

Mimal infiammiten na takin an tuar dawn tih a chiang a, a nghawng tur lian tak erawh World Cup a ni. Kum 2022 November 21 aṭanga khelh tura an inlan lo tur hi football ngainatute tan channa lian tak a ni ang.