Messi manah Mahrez, Silva leh Jesus kal dawn lo

Lionel Messi nena sawizawm hlawh mek Manchester City chuan Barcelona thiampuipa an lakluh theihna turin Bernardo Silva, Riyad Mahrez leh Gabriel Jesus chu Nou Camp lamah an kaltir dawn niin sawi mah se thuthang dik lo a nih thu an sawi. 

Khawthlang media lam chuan City boss Pep Guardiola leh Messi an inbe ngei niin sawi mah se hemi chungchangah erawh City an ṭawng chhuak duh rih lo a, Barca nena sawizawm defender Angelino leh Eric Garcia erawh Catalan club lamah hian an kaltir ngei a rinawm. 

Kum 19 mi Garcia hian City-ah kum khat chauh contract a nei tawh a, Barca-in lakluh an tum centre back hian contract thar a ziak duh lo. Angelino hian season chawhnu lam kha RB Leipzig-ah loan-in hun a hmang a, Barca chuan kum 23 mi left back hi an rim mek nia sawi a awm bawk.