Bale-a'n minute 45 a khel

Wales-in Ningani zanah Finland 1-0 in an hneh a, captain Gareth Bale-a'n first half chiah a khel. Inkhelh banah Ryan Giggs chuan Real Madrid forward-in minute 45 chauh a khelh chu an ruahman lawkna a nih thu a sawi.

Wales coach Giggs chuan, "Inkhelh hmain ruahmanna a awm sa tawh. Mumal taka a inkhelh loh avangin a inhliam ka hlau a, chubakah Pathianni zanah ṭha zawka a khelh theih nan minute 45 a khelh hi a ṭhain ka hria," tiin captain Bale-a chungchang a sawi.

Pathianni zan dar 6:30-ah Wales-in Cardiff City Stadium-ah Bulgaria an mikhual dawn a, an khingpui tur Bulgaria hi Ningani zan khan Republic of Ireland nen 1-1 in an inhnehtawk.

Helsinki Olympic Stadium-ah Cardiff City forward Kieffer Moore-a'n Wales chakna goal a khung a, Bale lakchhuah a nih lai hian goal a la lut lo.

Wales tan Manchester United winger Daniel James-a'n hmun pawimawh a chang a, a tlan chakna hmangin Finland tibuai ṭhin hle. Moore goal khung pawh hi James-a cross aṭanga lut a ni.