United-in Old Trafford an mawi

Pathianni zan khan Louis van Gaal-a enkawl Manchester United chuan Old Trafford-ah an theihna an phochhuak a, anmahni ang bawka season thara Champions League khelh tum Tottenham Hotspurs chu 3-0 zetin an sawp.

Spurs hnehtu United hi FA Cup quarterfinal-a Arsenal laka tlawm tih kha a hriat tawh lo a, Dutch manager hnuaia an game ṭhat ber ṭum an phochhuak.

Argentine midfielder hrem vanga khel thei lo Angel Di Maria aiah Juan Mata a lut a, Spanish midfielder finna hi United game hmuhnawmna chhan a ni a, captain Wayne Rooney thawhrimna leh thiam­na hmuh hmaih a thiang lo bawk.

Minute 9-na lekah Michael Carrick-a pass chu tawih takin Marouane Fellaini-a'n goal-ah a chantir a; minute 19-naah Fellaini thawhrah chu Carrick-a'n dik thlapin a tauh lut a, keeper Hugo Lloris dem theih a ni lo.

United game ṭhat vanga talbuai Spurs-in minute 30-naah insiamṭha tumin Andros Townsend aiah Mousa Dembele a luh tir a, a fuh chuang lo.

Spurs midfielder Nabil Bentaleb tihsual chu Rooney-a'n a hmang ṭangkai a, Spurs player pathum ven zawh loh United captain chu keeper Lloris-a'n a dang thei bik lo. Minute 34-naah 3-0 a ni a, awmze nei taka Rooney goal celebration chuan sawi zui a hlawh hle.

Rooney hian goal a khung zawhah boruak a hnekin a tlu der zui a, hetia a chet chiam nachhan hi engdang vang ni loin Stoke City defender Phil Bardsley nena an inhnek fiamna media lama a darh chiam vang a ni. Chesire-a Rooney te inah United player hlui Bardsley leh Rooney te hi an inhnek fiam a, video aṭanga a lan dan chuan Bardsley hian Rooney hi a knockout.

United captain chuan, "Kan in a thil thleng a ni a, mipui hmaa tih chhuah loh tur ṭhian infiamna mai mai kha chanchinbuah a lang. Kan chenna khawvel kalphung a ni," tiin a sawi.

Goal thum luh hnuah United an fimkhur a, chak chiang tawh Van Gaal-a hoten second half-ah goal khung tumin an khel tawh lo a. Bench aṭanga rawn lut Radamel Falcao-a'n goal khung turin hun tam a nei lo a, an khelh danah goal khungna chance a awm tawh lo.

Tottenham manager Mauricio Pochettino chuan, "Kan khelh chhiat avangin kan lungawi lo a, kan khelh fuh loh chhan hi kan enfiah a ngai a ni. Goal hmasa ber kan chhuah hnu khan inkhel a zo a ni ber a, Manchester United tan harsatna kan siam thei lo a ni," tiin an khelh ṭhat loh thu a sawi.