Chak hmel la hmu lo Zarkawt Serpents leh Chaltlang intum dawn

Samsung 3:16 Plan Solution Mizoram Super League inkhel zaninah hmuh tur a awm dawn a, vawi li khelh tawha chak hmel la hmu lo team pahnih Zarkawt Serpents leh Chaltlang Ryders an intum dawn.

Vawikhatmah chak hmel la hmu ve lo an nih avangin team pahnih hian MSL-ah a vawikhat nana chak hmel hmuh ngei an duh dawn a, inkhel boruak a sang khawp ang.

Zarkawt Serpents tan Champhai tlangval Hmingthanmawia khelh ṭhat leh ṭhat loh a pawimawh dawn. Ani hian Serpents tan point 47 score tawhin rebound 26 a nei thei. Points 48 hlawh chhuaka rebounds 26 nei thei Chawnpui tlangval K.Lalhruaitluanga pawh hi Chaltlang Ryders tan ven uluk ngai tur a ni ang.

Chaltlang Ryders tan Lalmuanpuia Zote hi an innghahna tur a ni leh ang. Ramhlun North tlangval hian a team tan points 81 zet a score tawh a, MSL-ah amah aia point score hnem an la awm lo. Heti chung hian rebounds 24 zet a la nei cheu. Mahse, mi pakhat chauhah a innghah theih loh avangin chak tur chuan Lalmuanpuia Zote hi a team-mate te'n an thlawp ṭhat a ngai ang.