Atletico mikhual tur Leverkusen

Atletico Madrid khelmual Vicente Calderon Stadium-ah zanin dar 1:15 hian German club Bayer Leverkusen an leng lut dawn a, Champions League quarter final luh an inchuh ang.

February 26 khan Cham­pions League Round of 16 first leg hi Leverkusen khelmualah an lo khel tawh a, German club hian an mikhual Spanish champion hi 1-0 in an hneh.

Atletico hian an mikhual hi an hneh let thei a nih chuan a vawi sarih na atan quarter final an lut thei dawn. Spanish club hian Bundesliga club lakah home record an nei ṭha thawkhat hle a, vawi 15 mikhual an nei tawhah vawi 10 an chak a, ṭum thum chak zo loin ṭum hnih an inhnehtawk bawk.

Leverkusen hian Spain-ah hnuhma an la nei ṭha lo hle a, vawi 14 an zin chhuah tawhah vawi kua ngawt an tlawm haw a, ṭum hnih inhnehtawk puiin ṭum thum chauh an chak thei. Tun hi an tan record siamṭhatna remchang a ni.

Record nei ṭha lo mah se tunkar Inrinni zan khan Leverkusen hian VfB Stuttgart chu 4-0 a an sawp theih avangin Spain-ah hian an zam lo ang.

Atletico lam tan fiahna hun a ni dawn a, an match hnuhnung pathumah an chak zo lo vek. La Liga champion nawn turin beisei an nei chau tawh a, Champions League-a beisei nei zel turin zanina chak hi an mamawh a ni.