ICC World Cup group stage thlirletna

February 14-ah ICC World Cup-2015 khelh ṭan a ni a, match hmasa berah a thlengtu pakhat zawk New Zealand leh champion tura rinkai zinga mi Sri Lanka an inkhel a, New Zealand-in run 98-in hnehna an chang.

Kumin World Cup group stage-ah champion lai India leh New Zealand an che ṭha fal a, vawi ruk khelhah an khingpuite hneh vekin points 12 hmuh theihnaah points 12 an hmu ve ve.

World Cup-ah hian ram 14 te chu Pool A leh Pool B-ah team pasarih ve ve an ṭhen darh an ni a, pool khat aṭangin team pali ve vein super eight an lut. Kumin World Cup-ah hian game chhinchhiah tlak leh record thar siam a awm nual.

Khawvel ngaihven

India leh Pakistan

Kumin World Cup khelh a nih ṭan hma hauha sawi hlawh ber pawl chu group stage-a India leh Pakistan inkhel tur kha a ni. Adelaide Oval, Adelaide-ah India leh Pakistan an inkhel ta ngei a, India-in run 76 zetin hnehna an chang. World Cup-a India-in Pakistan vawi ruk an hneh zawnna a ni a, Pakistan-in World Cup-ah India an la hneh ve miah lo thung.

Virat Kohli a che ṭha fal a, India tan run 107 vawchhuakin century a hlapchhuak. Kohli hian India tan ODI century vawi 22 a vuakchhuahna a thleng a, India tan a aia ODI century siam hnem awmchhun chu Sachin Tendulkar niin ani hian vawi 49 zet century a hlapchhuak thei a ni.

India leh Pakistan inkhelh hian entu a ngah hle. Khawvel pumah mi tluklehdingawn 1.5 velin inkhel hi an en a, a hmunah mi 45,000 chuangin inkhel hi an en bawk. An inkhelhna hmun Adelaide khawpui a lun phah a, mikhual kal an tam em avangin a vawi khat nan Adelaide Airport chu zankhua a hawn a ni.

Record thar a piang zel

Kumin World Cup group stage-ah record thar siam a awm nual a, chung zinga sawi zui hlawh ber chu West Indies batsman Chris Gayle double century kha a ni.

West Indies leh Zimbabwe an inkhelh ṭumin Gayle hian ball 147 a hmachhawnah run 215 zet a vawchhuak a, World Cup match-a double century vaw chhuak thei hmasa ber a ni.

South Africa batsman David Miller leh JP Duminy te chuan Zimbabwe an khelh ṭumin run 256 an vawchhuak a, ODI chanchina fifth wicket partner-in run an siam hnem ber record a ni.

New Zealand batsman Brendon McCullum chuan England an tum ṭumin ball 18 a hmachhawnah half-century a vaw chhuak a, World Cup chanchina half century vawchhuak tura ball mamawh tlem ber record a ni.

South Africa captain AB de Villiers chuan West Indies an tum ṭumin run 162 a vawchhuak. Run 150 vaw chhuak turin ball 64 chiah a mamawh a, World Cup chanchina run 150 vaw chhuak tura ball mamawh tlem ber record a ni.

Australia leh Afghanistan an inkhelh ṭumin Australia-in run 417 an siam a, India in 2007-a Bermuda an hneh ṭuma run 413 an siam chu lehpelin World Cup match khata run siam hnem ber record an siam.

Sri Lanka captain Kumar Sangakkara chuan match li chhung a zawnin century a hlap chhuak a, World Cup mai ni lo ODI chanchina match li chhung a zawna century siam thei hmasa ber a ni.

Brendan Taylor-a chawl

Zimbabwe captain Brendan Taylor chuan World Cup-ah a ODI match hnu­hnung ber a khel a, World Cup zawhah ODI a khel tawh dawn lo. Taylor hian Zimbabwe tana a match hnuhnung berah hian India hmachhawnin ball 110-ah run 138 a vaw chhuak a, Zimbabwe tan ODI century vawi riat hlap chhuakin Zimbabwe tana 100 vaw chhuak ngun ber a nih mai bakah Zimbabwean zinga World Cup-a run siam hnem ber a ni bawk.

Kumin World Cup-a century vawi li hlap chhuak tawh Sri Lanka veteran Sangakkara chuan World Cup zawh hian ODI chawlhsan a tum. World Cup bik hrim hrimah century vawi nga hlap chhuak tawhin a aia century siam hnem awmchhun chu cricketer ropui chawl ta Sachin Tendulkar a ni a, ani hian century vawi ruk World Cup-ah a siam thei a ni.

Beisei loh result

Kumin World Cup-a beisei aia rawn khel ṭha chu Ireland an ni. An match hmasa berah West Indies hnehin an target run 304 an umpha a, World Cup bikah run 300 chuang target vawi nga um pha tawhin an ni aia run 300 chuang umpha hnem an la awm lo. Ireland hian an World Cup match ruk khelhah vawi thum hnehna an chang a, anmahni ang tho a vawi thum chiah chak West Indies aia an run rate a chhiat vangin super eight an lut thei lo, an tlak dan hi a uiawm hle.

World Cup hmaa thawm nei lian tak England-in beisei an phak lo a, match vawi ruk an khelhah vawi hnih chiah hnehna changin an tla a, an mualpho.