Lyon chak zawh loh zanah Ibra goal hnih a tawk bik lo

Inrinni zan khan French League 1-ah champion tum Lyon leh Marseille chu goal lut loin an inhneh tawk a, inkhel dangah Ibrahimovic-a'n goal hnih thun mah se Bordeaux lakah Paris St-Germain chu 3-2 in an chak lo.

League match 29 khelh tawh aṭangin Lyon hian point 58 hmuin hma an hruai mek a, an hnuai chiahah hian PSG awmin anni hian point 56 an hmu thung. Pathumnaah point 54 hmu tawh Marseille an awm bawk avangin kuminah hian French League 1 champion tura inum boruak a sang chho zel dawn a ni.

Bordeaux tan Ludo­vic Sane chuan goal hmahruai minute 18-naah a khung a, he goal hi PSG striker Ibrahimovic chuan minute 50-ah a sut. Minute 70-na a Wahbi Khazri-a goal thun chu penalty aṭangin minute 85-ah Ibra-a'n sut ve leh mah se, Diego Rolan chuan he inkhel a goal hnuhnung ber leh Bordeaux chak na goal ni bawk chu a thun leh a ni.

Ṭawng tam Ibra

Ṭawng tam leh ṭawng­kam bungraw duh­tui lo ve thei tak Swedish Ibrahimovic chuan inkhelh banah referee Lionel Jaffredo chu na takin a sawisel leh a, France ramah referee ṭha a hmuh ngai loh thute thinur taka a sawi chhuah bakah France ram hian PSG ang club ṭha neih an phu lo a ti tel bawk.

Ibra thusawi avang hian demtu leh ngei tu an tam em em mai bakah, thuneitu lam pawhin an ngaimawh hle a ni.

French sports minister Patrick Kanner chuan, "He a ṭawngkam avang hian ngaihdam a dil ngei tur a ni," tiin a sawi.

Swede kum 33-a upa Ibra chuan, "Ka thinrim laiin ṭawngkam mawi lo tak ka hman avang khan ngaihdam ka dil e. Ka insum theih loh avang khan ka duh loh thlengin ka lo sawi palh a ni. Ka thusawi khan French mipui emaw French ram pumpui a kawk lo," tiin ngaihdam a dil zui.