Real Madrid an tho chhuak ta

March 23, Pathianni zan dar 1:30-ah El Classico thlir tur a awm dawn. Pathianni zan khan Real Madrid-in Gareth Bale-a goal hnih hmangin Levante an hneh a, Barcelona nen point khat chiaha an inthlauh avangin El Classico hmuhnawmna a belhchhah ang.

Tunhnaia Real result a ṭhat loh avangin Santiago Bernabeu-ah pawh pla­yer-te'n supporter-te lawm an hlawh tawh lo. Amah­erawhchu Pathianni zanah mipui 'boo' kha lawmna au thawma thlak turin hun tam an mamawh lo a, minute 18-naah Bale-ah goal hmahruai a khung.

Darkar chanve a ral meuh chuan Real-in inkhel an thunun tawh a, mipui an hlim tawh.

Real hian La Liga-a Villarreal an draw hnuah Athletic Bilbao an hneh lo a, Champions League-ah Schalke an hneh lo. Mahse Levante hmachhawn Real Madrid erawh team dang daih an ni. Sergio Ramos-a kaihhruaina hnuaiah tlar hnung a phui a, Luka Mo­dric-a'n midfield a kaihruai ṭha a, kawng engkimah an chungnung a ni ber.

Minute 40-naah Bale-a'n goal hnihna a khung a, Real-in goal khungna chance ngah chhunzawm mah se second half-ah goal dang an khung belh thei tawh lo. Cristiano Ronaldo-a'n goal khungna chance a hlah tam a, player danglam a nih zia erawh a lantir tho.

Khawvel player manto ber pound maktaduai 85 man Bale-a'n game kaw chhung goal a khung loh avangin Spanish media lamin an sawisel nasa a, Welsh midfielder hian goal hmangin amah sawiseltute hi a chhang let.

Real Madrid manager Carlo Ancelotti chuan, "First half kan khelh dan kha chu duhthusam a ni a, second half-ah erawh kan chak chian tawh avangin kan theihna zawng zawng kan lantir lo. El Classico-a starting eleven tur chu tunkara ka â thut a nih loh chuan ka chiang tawh," tiin a sawi.