Parma point an paihsak
Italian Football Federation (FIGC) chuan Serie A club Parma chu an player-te hlawh an pek theih loh avangin point hnih an paihsak.
Parma hian tun season chhunga an player-te hlawh an bat zat sak hi euro maktaduai 197.4 (£145m) a ni a, tunah hian table mawngphahah an awm mek. Parma hi December thlaa point khat an paih sak tawh bawk avangin point thum an chan tawh a, point kua chauh an la hmu a, 17-naa awm Atalanta-in point 25 an hmu tawh avangin Parma tan season thara Serie A khelh zelna chance a chhe tawh hle.
Parma hian kar liamta khan Serie A an khelh tluan theih nan club dang hnen aṭangin euro maktaduai nga an puk tawh a; UEFA Cup vawi hnih champion tawh Parma hian 19 khian a sum dinhmun sawifiahna hun an nei ang.
Nikum khan table-ah paruknaah awmin Europa League khel thei dinhmunah ding mah se pawisa ba an ngah avangin UEFA dan an zawm thei lo a, European competition-ah tel phal sak an ni lo.