Goal thun mamawh Arsenal leh goal ven tum Monaco

Zanin dar 1:15 hian UEFA Cham­pions League last 16 second leg chu Monaco khelmual Stade Louis II-ah an khel dawn. Emirates Stadium-a first leg khelhah Monaco 3-1 in an chak a, Arsenal tan quarterfinal thleng turin a tlem berah goal thum tal an khung a ngai tawh dawn.

Monaco hian Inrinni zan khan Ligue 1-ah Bastia chu 3-0 in an sawp a, hemi zan vek hian Arsenal-in Premier League-ah West Ham United chu 3-0 in an lo sawp ve bawk. Arsenal tana thu lawmawm chu West Ham lamah goal thum an khung satliah lo a, an goal khung zawng zawng kha class tak vek a ni.

Monaco hian kum 2003-04 season hnua a vawi khat nan Champions League quarter final an luh theihna hun ṭha an nei. Arsenal hi Champions League last 16-ah a zawnin vawi 15 an inlan tawh a, mah se tun hnai season li chhungin quarter final an lut tawh lo.

Inlan tura rin

Monaco tan first leg-a hrem vanga khel thei lo defensive midfielder Jeremy Toulalan leh inhliam vanga chawl centre back Ricardo Carvalho te chu chu a inlan thei tawh dawn a, goal venhim mamawh Monaco tan chanchinṭha a ni.

Tlarhma lamah Inrinni zana Bastia laka goal hnih khungtu Anthony Martial-a hi Arsenal tlarhnung tan ven uluk a ngai hle ang.

Arsenal tan French striker Olivier Giroud chu innghahna tham a ni a, FA Cup-a Manchester United hnawtchhuaktu Danny Welbeck an kawl bawk. Midfield khaikhawm turin Santi Cazorla a ṭangkai leh ang a, goal nawr turin Alexis Sanchez leh Mesut Ozil te an nei cheu bawk. Chak lo tur chiangsa a dah mai chi an ni lo.

Khel lo tur

Arsenal midfielder Jack Wilshere, Mikel Arteta, Tomas Rosicky leh Alex Oxlade-Chamberlain te bakah defender Gabriel Paulista leh Mathieu Debuchy te chu inhliam vang vekin an khel thei lo ang.

Monaco defender Andrea Raggi leh midfielder pathum Tiemoue Bakayoko, Jeremy Toulalan leh Geoffrey Kon­dogbia te chu inhliam vangin an khelh theih a rinawm loh bawk.

Kan la chak thei - Wenger

Arsenal managar Arsene Wenger chuan French club Monaco chu an la lehthal theih thu a sawi.

Monaco coach hlui Wenger chuan, "A harsa dawn, mah se kan tih theih ka beisei. Monaco hian an goal venhim an ngai pawimawh tawh dawn avangin a harsa dawn tih chu a chiang sa a, mah se goal khung tumin kan nawr tlat dawn a ni. Chak tur chuan hma takah goal kan khung a pawimawh dawn a chumi tur chuan kan inbuatsaih bawk," tiin a sawi.

Kum 65-a upa French manager chuan sawi chhun zawmin, "Goal thum thun hi kan theih ngei ka ring, kan tan chuan chona ṭha tak a ni. Quarter final thleng turin kan theih tawp in kan sual dawn," tiin West Ham United 3-0 a an hneh zawhah a sawi.

Monaco boss Leonardo Jardim ve thung chuan, "Arsenal lam chuan player ṭha tak tak an kawl khawm a, keini lam chuan team ṭha tak kan nei ve thung. Kan khelmual a nih tawh dawn avangin kan zam lo a, kan goal venhim kan ngai pawimawh ang. Chutihrualin goal thun tumin kan nawr dawn lo tihna erawh a ni lo. kan tum ber tur chu quarter final thlen a ni," tiin a sawi.