Vettel-a'n beisei a nei sang

Sebastian Vettel chuan season duhawm lo an hman mekna aṭanga thawh chhuah a duh a, tun kar tawpa Formula 1 Italian Grand prix an tlan hunah Ferrari team chuan harhna an chan ngei a beisei thu a sawi.

Ferrari hian an elpui Mercedes an phak lo rei ta viau, kuminah pawh an umphak lo. A bik takin intlansiak hnuhnung Belgian Grand Prix-ah an driver pahnih Vettel leh Charles Leclerc te hi a sang zual 10 zingah pawh an tel phak lo.

Pathianni zan dar 6:40 hian Italy rama tlan kawng hming thang Autodromo Nazionale Monza-ah inelna an nei dawn, Italy hi Ferrari hmunpui a ni a, season dangah pawh an chet ṭhat tawh ṭhinna hmun a ni.

World champion vawi li ni tawh Vettel chuan, "Chiang taka ka sawi ngam chu intlansiak hautak tak a ni dawn, kar hmasa lama kan tih fuh lohna lai siam ṭhain beisei erawh kan nei sang. A bik takin Monza a inelna neih a nih tawh chuan kan boruak hi a ṭha zual ṭhin," a ti.