Saints-in Stamford Bridge an zawh nghing

Premier League-ah Chelsea-in hmahruaitu an nihna chhawm nung zel mah se hnehna an chang zo lo. Pathianni zan khan Champions League khelh tum Southampton nen an khelmualah 1-1 in an ṭin.

Stamford Bridge-a inkhelah Chelsea tan Diego Costa chuan goal hmahruai khung a, Southampton-in Dusan Tasic-a penalty hmangin an chhanglet.

Champion tum vs UCL khelh tum

Chelsea hi table chung berah awmin champion turin an dinhmun a ṭha hle a, anmahni hnaih bertu Manchester City-in an khingpui Burnley an lo hneh lo bawk nen Pathianni zan hi an tan hmahruai falna hun ṭha a ni.

Southampton hi beisei phak baka season hmang ṭha, tunhnaia chesual an ni a, Champions League khelh ngei an tum vangin chak ngei an tum.

Chelsea-in an nawr nghal a, Willian a hlauhawm thei hle. Goal khungtu erawh Diego Costa a ni a, striker nungchang ṭha lo ve tak hian Branislav Ivanovic ball cross chu Premier League-a a goal 18 na turin a tauh goal.

Chelsea an lawm rei lo, minute 19 naah khel ṭha em em mai Sadio Mane chu Chelsea midfielder Nemanja Matic chuan box chhungah a lo ti tlu a, penalty a chawi. Kum 26-a upa Serbian midfielder Tadic chuan goal-ah chan tir a, Stamford Bridge-a Chelsea fan-te a ngawi ṭhap.

Hemi hnu hian goal dang a luhbelh tawh lo a, Oscar leh Eden Hazard te'n Chelsea tan goal hlauhawm rawn nei leh mah se Southampton keeper Fraser Forster chet ṭhat ṭum Chelsea-in an tawng a, 1-1 a an ṭin a ngai ta a ni.

Eng nge an sawi?

Chelsea manager Jose Mourinho chuan, "Inkhel bul kan ṭan ṭha a, penalty kan chawi hnuah kan game pangngaiah kan let leh thei ta lo a ni. Ramires rawn luh hnu khan kan game-in ngai a awh leh chauh a ni. Point ngaa hma hruai sa chungin kan khel a, tunah chuan point ruk a hmahruaiin game khatin kan khel tlem bawk," tiin an khelh danah a lungawi thu a sawi.

Southampton manager Ronald Koeman chuan, "Game harsa tak khel chungin point hlu tak kan hlawhchhuak thei a ni. 1-0 a hma an rawn hruai hnu khan kan khel ṭha lehzual a, first-half-ah kha chuan kan chungnung zawkin ka hria. Forster khan a khel ṭha takzet a, team tan a ṭangkaiin Europe-a keeper ṭha ber pawl a ni," tiin an goal-keeper a fak.