Qatar an ṭan a ngai - Blatter

Fifa president Sepp Blatter chuan 2022 World Cup thlengtu tur Qatar chuan insiamṭhat an mamawh thu leh tun aia an ṭan lehzual a ngaih thu a sawi.

Qatar hi tunhnaiah World Cup khelhna tur hmun stadium sakna a inhlawhfa a chhawrte enkawl ṭha tawk lo a puh an ni a. Human Rights Organisation Amnesty International phei chuan langsar takin an lo sawisel tawh a ni.

Blatter chuan hemi chung­chang hi sawi langin Qatar chuan hnathawh dan hmangah hmasawnna tur tam tak a nei a ni. FIFA president hian Qatar Emir Sheikh Tamim bin Hamad Al Thani a hmuh zawhah he thu hi a sawi chhuak a ni.

Kum 2013 khan Qatar-a World Cup inbuatsaihna atana ram pawn lam mi hnathawk mi 180 lai chuan khaw lum hnuaia hnathawh rim lutuk avangin an nunna an lo chan tawh a. May 2014 khan sorkar thuchhuah chuan hnathawktute chu anmahni ruaitute thu lo chuan Qatar chhuahsan phal lohna thu an lo tichhuak tawh bawk a, hei tak hi Human Rights pawl hrang hrang leh Blatter te'n a an sawisel chu a ni.