Indian Super League Club-te sum hman dan tur duang thar
Indian Super League enkawltu Football Sports Development Ltd (FSDL) Governing Council chuan ISL club tinte chu season tharah cheng vaibelchhe 20 aia tam player-te hlawhah seng lo turin a hriattir.
FSDL hi ISL buaipuitu IMG-Reliance leh Star India hnuaia ISL enkawl tura din a ni a, ISL team pariatin Board member an thawh ṭheuh bawk.
Ruahmanna hi ISL alo hmuhnawm zawk theih nana duan a ni a, season hmasa khan team ṭhenkhatin sum an sen nasat lutuk avangin team-te an inrualkhai tawk lo a, a hmuhnawm tur anga hmuhnawm loah FSDL chuan a ngai a ni.
FSDL-in ruahmanna an siam danah chuan ISL 2015 season atan club tinin cheng vaibelchhe 20 aia tam an seng lo anga, marquee player pakhat ṭheuh season hmasa ang thoin an nei thei ang. Club te'n an duh chuan season hmasa a an marquee player neih sa an ring thei anga, League hruaitu te hnen aṭanga phalna lain an duh zawng player marquee player turin auction paltlang kher ngai loin an la thei dawn bawk a ni.
Club tinin season hmasa ram pawn player an kawl sa aṭangin a tlem berah ram pawn player pakhat tal an kawl chhunzawm a ngai dawn a, panga aia tam ram pawn player an kawl chhunzawm thei lo thung. Ram pawn player-te hi anmahni thuin an lalut thei dawn bawk a ni.
Club tinin a tlem berah player 22 an nei tur a ni a, a tam berah 25 neih phalsak an ni bawk. Player-te hi marquee player pakhat, international player pariat leh ram chhung player 13 bakah U23 player pahnih an ni tur a ni.
ISL hian Indian player, senior team-a khel phak season hmasa ISL-a khel ve lote tan auction hun a buatsaih dawn a, club tinin player pakhat ṭheuh he auction aṭang hian an lei thei ang.
ISL ruahmanna thar chungchang hi sawiin ISL thupuangtu chuan, "Kan ruahmanna thar hi club tinte an phur zawk nan leh an players duhzawngte an kawl chhunzawm zel theih nan a duang kan ni a, team tin an in el tawk nan leh competition sang zawk hmuh hi ka duh ber chu a ni," a ti.