Lazio tana khel tur Reina

Serie A club Lazio chuan AC Milan aṭangin goalkeeper Pepe Reina chu season hnih chhung an hnena khel turin an lalut a, season hmasa chawhnu lam kha Aston Villa-ah hun hmangin 

Premier League-ah a inhamtanpui a ni. 

Kum 38 mi goalkeeper hian Champions League khelh a duh vangin Lazio hi a zawm a, chutihrual chuan first choice goalkeeper ni loin Albania international Thomas Strakosha thachhang dawltu tur a ni ang. 

Strakosha chuan, "Reina hi football chanchina goalkeeper chak ṭha ber pawl a ni a, tawnhriat ṭha tak nei niin a êng zawnga thil thlir ṭhin mi a ni bawk. Hma ka sawn zel theih nan min pui dawn a ni," a ti a, kum 25 mi goalkeeper hian Reina hnen aṭangin inzir belh tur a neiah a ngai. 

Lazio hi season hman zawh takah khan Serie A-ah palina an ni a, kum 13 chhunga a vawi khat nan Champions League khel turin an tling - hei hi Reina-a'n a pan chhan a ni. Spain tana vawi 36 inlan thei Reina hi World Cup 2010 champion team zingah pawh a tel a, mahse Spain-ah pawh hian Iker Casillas thachhang dawltu niin a hun tam zawk a hmang. 

Barcelona youth system chhuak Reina hian Barca tan kum 2002 thleng a khelh hnuah Villarreal a pan a, Spanish club aṭang hian kum 2005 khan Liverpool a zawm. Liverpool tan match 398-a khelh hnuah Napoli, Bayern Munich, AC Milan leh Aston Villa tan a khel a, Lazio-ah chona thar a hmachhawn leh dawn ta a ni.