Celtics lakah Raptors chak ve hram

Inkhel tawp nan 0.5 seconds chauh a awm tawh a, chak lo tura ngaih Toronto Raptors tan guard Kyle Lowry chuan 3-points vawm lutin a team chu Boston Celtics lakah 104-103 in hnehna a chan pui.

Eastern Conference semifinal inkhelah Celtics hi che fuh hmasa zawk an ni, harsa lutuk loin game hmasa pahnih an la. Nimin zinga khelh game 3-ah pawh an chak leh ngei dawnin lang hman mah se hamrik hnuhnung ber a rik rualin an dinhmun a danglam ta zawk.

Boston Celtics hian series-ah 2-1 in hma an hruai a, Pathianni zing dar 4:00-ah game 4 an khel ang. Raptors lamin beiseina an neih thar ve leh tak avangin inkhel a hmuhnawm zual sawt tura ngaih a ni.

Western Conference semifinal lamah Los Angeles Clippers chuan Denver Nuggets 120-97 a hnehin game 1 an la, anni pahnih hian Pathianni zing dar 6:30-ah game 2 an khel ve leh thung ang.

Clippers chak nan hian Kawhi Leonard chu tha thawhtu pawimawh ni lehin point 29 a nei. Ani bakah hian Paul George (19 points), Marcus Morris (18) leh Montrezl Harrell (15) ten an khel ṭha bawk; Nuggets lamah erawh khel ṭha fal an awm loh an tuar.