Thiago a dam chho zel

Liverpool midfielder Thiago Alcantara  chuan dam lam a pan zel a, Bayern Munich aṭanga Merseyside club zawmtu hian gym lamah fitness session neiin Liverpool training ground AXA Training Centre-ah pawh amahin training a nei leh thei tawh. 

FIFA FIFPro World 11-a lang Thiago chuan, "Ka lo kir theih hun tur chiang takin sawi theih a ni lo a, zawi zawiin ke kan pen ve zel a ni. Kan hmaa bang chhah tak awm angin kan ngai a, chumi tawn tlang tur chuan insiamrem hret a la ngai a ni," tiin a sawi. 

Kum 29 mi midfielder hian September khan Liverpool hi a zawm a, mahse, October-a a khup hliam vangin Reds tan match hnih chiah a la khel.

Liverpool hian Nilaini zan khan Premier League hmahruaitu ni turin Tottenham Hotspur chu 2-1 in an hneh a, Mohamed Salah leh Roberto Firmino ten goal an khung - zanin dar 6:00-ah Crystal Palace an hmachhawn ang.