Gareth Barry a chawl ve ta
Premier legend tia koh phu Gareth Barry chuan kum 39 mi niin inkhelh a chawlhsan thu a puang a, Aston Villa midfielder hlui hi khelmual chhungah chuan kan hmu tawh ngai dawn lo.
Barry hian season hman zawh tak kha Championship club West Brom-ah hun a la hmang a, season tharah Baggies hian Premier League khel dawn mah se English top flight football-ah a kir ve dawn ta lo a ni.
West Brom chuan, "Record meuh siamin career ropui tak i nei a, duhsakna tinreng kan hlan che a ni Barry," tiin an club-a a hun tawp hmangtu footballer hi an thlah.
Barry zinkawng
Aston Villa aṭanga a professional career ṭantu midfielder hian 1997-98 khan a football season hmasa ber chu a hmang a, kum 2009 khan chhuahsanin Manchester City a zawm.
City tan hian kum 2013 thleng a khel a, Premier League leh FA Cup nomawi a chawipui hman a ni. City aṭangin Everton-a zawm a, kum 2017 khan West Brom hi a pan. Manchester City tana nomawi a chawi bakah hian Villa tan kum 2001 khan UEFA Intertoto Cup-ah a champion a, a career chhungin nomawi pathum bak chawi erawh a nei lo.
Record siamtu
England tan vawi 53 inlana goal thum khung thei Barry hian Premier League-ah match 653 khelin ani aia Premier League match inlan hnem an awm lo a, record thai chhiat har tak tur niin a lang.
September 25, 2017 khan Barry hian Premier League-a a match 633-na khelin Premier League-a inlan hnem ber record a siam a, match 632 kheltu Ryan Giggs-a record a khum. Barry hian he inkhelah hian West Brom tan captain armband hrengin Arsenal lakah 2-0 in an tlawm. Kum 39 mi Barry hian kum 22 chhung professional football player niin hun a hmang a, inelna hrang hrangah match 833-a khel.
Mangṭha Barry
Season hmasaa Baggies tana inelna hrang hranga match ruk chauh kheltu Barry hi a career ṭanna Aston Villa chuan, "Kan club tan match 44 khelin goal 52 a khung a, Villa-ah kum 10 chuang hun a hmang.
"A career tawpnaah Gareth Barry chu duhsakna tinreng kan hlah a, career duhawm tak a hman avangin kan lawmpui em em bawk a ni," tiin an player ropui chu an thlah. Manchester City chuan, "A hun tawpah City chhungkua chuan duhsakna sang ber kan hlan e," tiin an thlah a, Everton chuan, "Barry-i hun hman zel turah duhsakna kan hlan che. Career duhawm tak i hmang hi kan lawmpui che a, kan club-a i hun hman avang khan kan lawm takzet e," tiin an thlah
ve bawk.