TV-ah Premier League inkhel tam zawk
European football-a league ngaihven hlawh ber tih ngam Premier League club-te chuan season thara inkhel ṭhenkhat television lama live-a chhuah loh tur chu chhuah turin an ti leh mai thei a, inbiakna tluang taka nei a ni.
Premier League match 380 zinga match 160 chu live-a pekchhuah loh tura tih a ni a, mahse he thutlukna hi fans tam takin an hrethiam lo - Football Supporters' Association (FSA) chuan inkhel zawng zawng live-a pekchhuah a nih theih nan hma an la a, UK sorkar chuan Premier League chu ngaihtuahna thar seng turin a ngen bawk.
Covid-19 vangin fan-ten stadium-ah inkhel an la en thei dawn lo a, hei vang hian fans tam takin an club ṭan te inkhel TV lama live-a en tur awm thei lo tur chu an hrethiam lo a ni.
June-a Premier League chawlh reng khelh chhunzawm a nih khan match hmabak la awm 92 chu live-a pekchhuah a ni a, hei hi a chhan ber chu fan-ten Covid-19 vanga a hmuna inkhel an en theih loh vang a ni - hei hi chhunzawm turin fan-te chuan an duh.
Ningania thuneitute inhmukhawm hian thutlukna an siam hran lo a, hetihlai hian league hniam lam thuneitu English Football League leh Scottish Premiership-te chuan broadcaster nena inremin season-ticket nei fan-ten an club kaltlanga inkhel live-a an en vek theih dan turah inremna an nei.
Premier League season thara thil inthlak tur langsar zingah Covid-19 vanga substitution panga awm theia siam chu dan pangngaiin pathumah tihhniam a ni a, hei hi club hoin anmahni duhdan ngeia thutlukna an siam a ni.
English top flight football-a thuneitute chuan Covid-19 thawh hnihnain England-a nuai leh a nih pawhin season hmang zo ngei turin a thuphungin an rel a, thutlukna tak tak siam a la ni lo.
Season hman zawh tak tawp lama 'Black Lives Matter' logo chhu kaia club-ten hnam inpumkhatna an au pui ang kha kalpui a nih dawn leh dawn loh te pawh la ngaihtuah leh tur a ni a, hemi chungchang bikah hi chuan player-te rawn an ni ang.
Premier League hi September 12-a khelh ṭan leh tura rel a ni a, Championship aṭanga inpetkai Fulham chuan an match hmasa berah Premier League champion lai Liverpool hneha Community Shield chawitu Arsenal an hmachhawn dawn a ni.