India hmaah Bangladesh an ding dawn
Vawiin aṭangin ICC World Cup quarter-final khelh ṭan a ni dawn a, zing dar 9:00-ah South Africa leh Sri Lanka te'n bul an ṭan ang.
Ningani zing dar 9:00-ah India leh Bangladesh-in Melbourne Cricket Ground, Melbourne-ah an khel ve leh dawn. India ramin an nghahhlel tawh hle.
Inkhel tur chu
India hi World Cup ṭan hmaa khel chhe tak, sawiselna nasa tak hnuaia World Cup hmachhawn an ni. Mahse, World Cup an khel a, vawi ruk khelhah vawi ruk chakin group stage an khelh zawh meuh chuan World Cup ṭan hmaa sawisel rawn kha tunah chuan fak rawn an ni leh tawh.
World Cup ṭan hmaa India-in sawisel an hlawh nasat ber na chu an bowling lam a ni. Mahse, World Cup-ah India bowler-te'n an zia tak tak an pholang ṭan a, vawi ruk khelhah wicket 60 tehmeuh an la. India batting line up hi chu engtik lai pawn khawvela batting line up ṭha ber pawl an ni ṭhin.
Pakistan laka century vawchhuaktu Virat Kohli te, South Africa laka run 137 vawchhuaktu Shikhar Dhawan te hi Bangladesh bowler ho sawisa thei tur khawpa theihna nei an ni. Rohit Sharma, Ajinkya Rahane, Suresh Raina leh MS Dhoni te an la intlar cheu bawk avangin Bangladesh bowler-te mut a tui lutuk lo ang.
Bangladesh hi quarterfinal lut zinga mipui rinkai loh ber an ni. Group stage-a match ruk khelh tur awmah match nga chiah an khel a, Australia nena an inkhelh tur ruahin a tihbuai vang a ni. Vawi nga khelhah vawi thum chakin vawi hnih an chak lo a, an World Cup match hnuhnung berah England an hneh avangin inrintawkna nasa tak nen India hi an hmachhawn ang.
Thawnthu hlui
India leh Bangladesh hi World Cup quarterfinal-ah an la intum ngai lo. Group stage-ah erawh vawi hnih inkhel tawhin vawi khat ve ve an chak a, an intum hmasak zawk kum 2007 khan Bangladesh-in hnehna changin India champion kum 2011-ah erawh India an chak thung.
World Cup match-ah India player pahnihin Bangladesh an tumin century an hlapchhuak tawh a, kum 2011-a an inkhelh ṭumin Virender Sehwag chuan 175 vawchhuakin, Virat Kohli chuan run 100 a vawchhuak bawk.
Bangladesh player zingah India laka World Cup match bika century hlapchhuak thei an la awm ve lo.
ODI match hrim hrimah India leh Bangladesh hi vawi 29 an lo intum tawh a, Bangladesh-in vawi thum chiah hnehna chang ve in India in vawi 24 hnehna an chang thung. Vawi hnih erawh chak zawk awm loin an ṭin a ni.
India-in Bangladesh laka run an siam hnem ber ṭumin wicket pali chiah hlohin run 370 an vawchhuak a, Bangladesh-in India laka run an siam hnem ber erawh 283 a ni a, wicket pakua an hloh.
Bangladesh coach a pawr
Bangladesh coach Chandika Hathurusingha chuan, "India hian cricket game hmuhnawm tak an khel ṭhin a, team ṭha tak an ni. Mahse, naktukah erawh zam miah loa khel zawk zawkin hnehna kan chang dawn. India tumna hun ṭha kan neih avangin nuam ti takin kan khel anga, chak kan tum ang. Kan ṭhat leh ṭhat loh hi finfiah a ngai tawh chuang lo. Kan ṭhat tawk vanga quarter-final lut kan ni," tiin India hneh tura an ṭhat tawk thu a sawi.