FA Cup semifinal-ah Arsenal leh Reading

Kum 1927 hnua a vawi khat nan Reading-in FA Cup semifinal an lut. Reading hian Thawhṭanni zan khan kum 88 hnua a vawi khatna atan semifinal an thleng.

Semifinal-ah hian champion lai Arsenal nen an inhmachhhawn ang a, semifinal lehlamah Black­burn leh Liverpool inkhel a chak zawkin Aston Villa an inhmachhawn thung ang. Semifinal hi Wembley Stadium-ah April 18 leh 19 khian khelh tur a ni. Quar­ter final-a chak lo team hian ngaihhruina Rs 1,66,88,770.36 an dawng a ni.

FA Cup semifinal thleng turin Reading hian fourth round-a Chelsea hnehtu Bradford chu 3-0 in an sawp a, minute 10 hmain goal hnih an khung hman. Minute rukna lekah winger Hal Robson-Kanu chuan goal hmahruai a khung nghal a, Garath McCleary chuan minute 9-naah a thun bawk. Minute 10 an khel tling chauh tihah Reading lam chuan an ke lehlamin Wembley Stadium an rap der tawh.

Second half minute 68-naah Jamie Mackie chuan Reading goal thumna leh inkhela goal awmchhun a khung bawk. Bradford City winger Filipe Morais chu minute 62-naah hnawh­chhuah a ni.

Reading manager Steve Clarke chuan, "Kan chen ngai lohna ramah kan cheng a ni ta ber rih e, semifinal kan thleng chauh ala ni a kha tiang em em khan fan-te lawmin kan lam nasa ang tih kha ka ring phak lo. Tunah chuan league lam kan ngaihtuah leh phawt a ṭul. Semifinal hmain league-ah point kan hmuh belh ngei a ngai," a ti.

Bradford manager Phil Parkinson chuan, "Bul kan ṭan ṭhat loh kan tuar a ni. Minute 10 lekah si hnih kan phurh tawh avangin kan tan thawhleh a harsa. Tunah chuan League match 11 khelh hmabak kan neihah kan rilru zawng zawng kan pek a ṭul tawh ang," a ti.