Sunderland-in an manager Poyet an ban

Season tawp a hnai ta, Premier League-ah champion chiang an la awm loh ang bawkin tla chiang an la awm lo. Tlak hlau Sunderland chuan Inrinni zana Aston Villa laka 0-4 lawiha an tlawm hnuin an manager Gus Poyet an ban.

Stadium of Light-ah mualneitu Sun­derland-in chawlh lawk hmain Aston Villa lakah goal li an phur tawh a, supporter lungawi lo ṭhahnem takin hun tawp hmain field an chhuahsan phah a, fans ṭhenkhat thinrimin manager pan an tum avangin security-te dan an ngai hial bawk.

Club chairman Ellis Short chuan, "Vanduai thlak takin hmalam kan pan thei lo a, tun season-a kan beisei ang result kan nei pha lo. Season tawp lamah table-a kan awm duh lohna lamah kan awm a, tla thei dinhmunah kan ding. Thlak danglam kan mamawh avangin thutlukna siam harsa tak siam a ṭul ta a ni," tiin a sawi.

Sunderland thuneitute'n Premier League match 12-a vawi khat chauh chak thei manager Poyet an nghak thei tawh lo a, Thawhṭanni training zawhah Uruguay manager hian chief executive Margaret Byrne leh board member dangte a hmu a, a thawh zel a rem ta lo.

Short chuan, "Gus hi kan club tana a hnathawh ṭha tak avangin a chungah kan lawm a, nikuma mak taka min chhanhim avang leh Cup final min thlen pui avangin kan lawm lehzual. A hnathawhte kha Sunderland supporter-te thinlungah rei tak a cham dawn a ni," tiin a sulhnu an hriat reng tur thu a sawi.

Poyet hian October 2013 khan Paolo Di Canio thlakin Black Cats hi a enkawl ṭan a, Premier League mawngphaha awm mek Sunderland chu hmun himah a hruai chhuak. Uruguayan manager hnuaiah Sunderland hian nikum season tawp match rukah vawi li an chak a, draw vawi khat an nei a, vawi khat dang erawh an chak lo. Black Cats hian Chelsea leh Manchester United an hneh a, Manchester City an draw bawk. Chumai a ni lo, 2014 Capital One Cup final an thleng a, final-ah erawh Manchester City nomawi chawi lai an en liam thung.

Sunderland thuneitute hian season thar an thlir a, season liamtaa Poyet-a record ṭha tak kha hre reng mah se Uruguayan manager chungah rinna an nghat ngam tawh lo.

Chelsea, Tottenham leh Uruguay midfielder hlui Poyet hian Sunderland hi match 75 chhung a enkawl hman a, vawi 23 chak pui a, vawi 22 draw neiin vawi 30 erawh an chak zo lo.