Premier League Manager-te
Kum 2015 thlen meuh chuan Premier League manager club paruk Aston Villa, Queens Park Rangers, Newcastle United, Crystal Palace, West Bromwich Albion leh Sunderland te'n result ṭha duhin an manager an ban a, season tawpah a tifuh ber chu a hriat ang.
Aston Villa-in Tim Sherwood-a enkawlna hnuaiah result ṭha chu an nei chiang a, hmun himah erawh an la awm lo. Sherwood-a luh hnuah Villa tlar hma lamin goal khung an awlsam a, Black Cats chunga an awm theihna turin goal li an khung a, Gus Poyet-a'n a hna a chan phah bawk.
QPR manager Harry Redknapp-a'n hriselna ṭhat loh vangin a hna a chawlhsan a, amah thlaktu Chris Ramsey tan hna hautak tak a hnutchhiah. QPR hi table-ah 19-naah an awm a, hmun him china awm point 26 hmu tawh Sunderland aiin point liin an hniam zawk.
Newcastle United supporter-te'n season bul ṭan ṭha lo Alan Pardew bang turin an nawr a, a chet ṭhat hnuah pawh Pardew-a'n lawm a hlawh loh avangin Crystal Palace-ah a chhuahsan. Newcaslte hian point 35 an hmu tawh a, manager thar John Carver hnuaiah dinhmun ngaihtuah awm a ni lo.
Pardew-a'n Newcastle a siam rem hnuah Crystal Palace-ah harhtharna a thlen a, Neil Warnock hnuaia talbuai Palace hi tunah chuan table-ah 12-naah an awm a, Newcastle aiin point hnih chiahin an hniam zawk.
West Brom-in January 1, 2015 khan manager Alan Irvine aiah Tony Pulis an la lut a, an tifuh. Pulis-a hnuaiah vawi sarih an khelh tawhah vawi thum an chak bakah vawi hnih draw an nei a, table hnuai lama awm tan chuan result ṭha tak a ni.
Table mawngphaha awm Leicester City-in an manager Nigel Pearson an la ban lo a, 18-naa awm Burnley pawhin manager Sean Dyche an la ban bik lo. Pearson leh Dyche te dinhmun a derthawng ang chiahin 15-naa awm mek Hull City manager Steve Bruce a dinhmum a duhawm chuang loh.
Season tawp a hnai a, club tinin season thara pawisa tamna Premier League khelh tumin ṭan an la mek. Hei hi league ti ngaihnawmtu a ni a, foobtall-in a ken tel a ni.