India leh Nepal inhnehtawk, India an tlang

Nimin tlai dar 3:15 khan India leh Nepal te'n World Cup pre-qualifier 2nd leg an khel a, goal awm loa an inhnehtawk avangin inkhel hmasa a 2-0 a chak India an tlang.

Dasarath Stadium, Kathmandu-a inkhelah hian India tan Mizo tlangval Lalrindika Ralte chuan bul aṭan a, Hnahthial tlangval Jeje Lalpekhlua erawh inhliam damkawr a nih vangin a hmel hmuh tur a awm lo thung.

Inkhel chu

Inkhel an ṭan a, inkhel ṭan tir lamah India striker pahnih Sunil Chhetri leh Robin Singh te hlauhawm thei viau mah se goal an khung thei tlat lo. Nepal in an chak loh chuan an tla dawn tih an hria a, theihtawp chhuahin an nawr. Mahse, Nepal in tlar hma lama players an neih ṭhat tawk loh an tuar a, India goalkeeper leh captain Subrata Paul tan hna hautak an siam thei tlat lo.

Goal khung loin first-half an ṭin a, goal hnih nei sa India dinhmun a ṭha.

Chawlhlawk hman zawhah India in inkhel an thunun leh nghal a, India striker Robin Singh-a'n minute 64 naa goal a khung chu referee in a pawm tlat lo. Minute 65 naah India in freekick an hmu, pet turin Mizo tlangval Didika a lo pen chhuak a, 30 yards vel a hla aṭanga a pet chu an lo tauh out hlauh.

Hun tawp hnaih lamah Nepal tan Shillong Lajong striker hlui Anil Gurung leh India tan Sunil Chhetri te'n hun ṭha nei mah se an pet goal lo ve ve a, goal in pe lo in hun a tawp. India in World Cup qualifying round 2 an lut ta a ni.

World Cup Qualifier second round inkhel tur hi April 14-ah draw neih a ni ang.

Beiseina thar nen India

India hi Asian football power­house a nih ṭhin avangin 'milian muthlu' tiin hminglem an phuah ṭhin.

India coach thar Stephen Con­stantine beiseina sang tak nen an ruai nawn a, a game hmasa berah 2-0 a chak pui nghalin World Cup qualification second round a luhpui.

India tan chuan hei hi lawmawm tak a ni. Nepal an hneh vang hian World Cup qualifying round-ah match riat tal an khelh a ngai dawn a, hei hi nikuma inetrnational friendly match pahnih chiah khel India tan chanchin lawmawm a ni.

Game heti zat an khelh aṭang hian FIFA ranking-a 173 na ni mek India tan 130 chung lam thlenga inhlankai theihna chance a awm phah dawn a ni.