Stadio Olimpico-ah Roma an chak lo

Thawhṭanni zan khan Stadio Olimpico-ah AS Roma an chak lo a, tun season a an home a an chak loh na hmasa ber a ni. An hneh loh hi Serie A club vantlang Sampdoria an ni.

Kartawp inkhelah hmahruai mektu Juventus in an khingpui Sassuolo chu 1-0 a an hneh avangin Juve leh Roma inthlauhna hi point ruk lai a ni tawh.

Inkhel ṭan aṭangin Roma in inkhel an thunun a, a tawp thlengin an thunun thei. Mahse goal an khung lo a, ball chang tlem Sampdoria in goal hnih an khung thung. First half-ah goal a lut lo a Roma tan Seydou Keita, Miralem Pjanic leh Francesco Totti ten goal khung theihna hun ṭha nei mah se an thun lo vek.

Second half-ah goal a lut, minute 60-naah Lorenzo De Silvestri chuan an goal hmahruai a khung a, Luis Muriel chuan an goal hnihna minute 78-ah a khung leh bawk. Hun tawp hma minute 10 la awmah Roma midfielder Keita chu yellow card vawi hnih a hmuh vangin hnawhchhuah a ni. Inkhel tawp thlengin goal a lut tawh lo a, Sampdoria in point thum an hmu.

Serie A inkhel dangah season thara Champions League khelh tum Fiorentina chuan AC Milan laka si khat an phurh reng hnuah hun tawp hma minute 10 chauh awm tawhah an leh thal a, 2-1 in an hneh.

Fiorentina lamin inhliam vangin David Pizarro, Mario Gomez, Stefan Savic leh Giuseppe Rossi te an chhawr thei loh avangin an game in a tuar deuh tih chu a hriat. Mahse, an beidawn duh loh rah a tawpah an seng a, minute 56-na a Mattia Destro goal thun hmangin Milan in 1-0 in hma hruai mahse Gonzalo Rodriguez-a'n minute 83-naah an si phurhna goal a khung a, hun tawp hma chiah in Joaquin chuan an chak na goal a khung leh bawk a ni.

Match 27 khelh tawh aṭang a point 35 chauh la hmu thei Milan manager Filippo Inzaghi a dinhmun a derthawng tawh hle a ngaih a ni. Hetihlai hian Fiorentina erawh in point 45 hmu tawh in table-ah pangana an ni mek a, Champions League khel thei chi chiah a awm mek Lazio nen an inthlauhna chu point li chauh a ni tawh.

Ka chhuah ka ring rih lo - Inzaghi

Milan manager Inzaghi chun a team te chu talbuai deuh rih mah se club a chhuahsan rih a rin loh thu a sawi.

Italian manager Inzaghi chuan, "Milan hi ka hmangaih avangin a rei thei ang ber cham ka duh, a lo berah kum 30 tal enkawl ka duh a ni. Tunah hian contract ka neih mek avangin ka la chhuak rih lo ang. Ka hmalam hun atan leh Milan tan hian hna ka thawk ṭhin a chu chu ka duh ber pawh a ni reng ang. Mahse min duh tawh lo a, min ban anih erawh chuan lawm tak in ka pawm thei tho ang," tiin a sawi.