Chanmarians hmaah tunge ding dawn?

Mapuia Cricket League 2015 khelh mekah vawiin hian final-a Chanmarians Cricket Club hmachhawn tur team a chiang dawn. Qualifier 2-ah league table-a pahnihna Ramhlun Venglai Cricket Club leh table-a pathumna Armed Veng Cricket Club-te an inhmachhawn dawn.

Ramhlun Venglai hi league-ah pahnihna an nih avangin Qualifier 1 an khel a, hetah hian Chanmarians chu wicket 8-in an hneh loa Qualifier 2 an khelh a ngai. Hetihlai hian league-a pathumnaa awm Armed Veng hi Eliminator-ah palina Zarkawt Lords chu wicket 6-a hnehin Qualifier 2 khel tur hian an inhlangkai thung. Qualifier 2-a an result hiMCL-a an hmalam hun hril tu tur a ni tawh dawn a, chak lo zawk chu an tla anga a chak zawkin final an lut thung ang.

An inhmachhawn tawh dan

MCL 3rd Edition-ah hian RVL leh Armed Veng-te hi league-ah vawi khat an inhmachhawn tawh a, hemi ṭum hian pathumnaa awm zawk Armed Veng hi wicket 9 laiin an chak. Mahse league match tawp lamah RVL hi an insiamṭhat chhoh avangin Armed Veng hi lehpelin pahnihna dinhmun an luah leh thei a ni.

An inkhelh hmasak hian RVL bat hmasain an opening batsman-te'n bul an ṭan ṭha viau a, India Under 19 team-ah pawh lo inlan tawh an player pawimawh K Vanlalruata chuan run 45 vaw chhuak mahse a ṭhiante'n an thlawp ṭha tawk lo a, over 17.2-ah out fai vekin run 87 chiah an tlin thei. Hemi chhan let nan hian Armed Veng-in fing takin an khel a, over 15.3-ah mi pakhat chiah hlohin run 90 an siama an chak. Armed Veng tan hian an chakna kawngah an opening batsman G Lalbiakvela chuan run 40 vaw chhuakin Lalruatsanga chuan run 24 a vaw chhuak ve bawk.

Vawiinah an inhmachhawn leh dawn

League-a an result-in vawiina an inhma­chhawn leh turah hian awmzia a nei tawh dawn lo a, vawiina chak zawk hi final lut tur an ni. Zing dar 10:30-ah Suaka Cricket Ground (SCG)-ah an inhmachhawn dawn a, team pahnihin thih leh thih ti a an beih a ṭul tawh ang.

Tun season MCL khelh chhungin Ram­hlun Venglai innghahna ber chu India Under 19 level-a captain pawh lo ni tawh K Vanlalruata a ni. Ruata hi India U19 captain a nih laiin tuna India World Cup team-a an player pawimawh Shikhar Dhawan leh Suresh Raina-te bakah India team-a hmun chang ve reng reng Ambati Rayudu leh Stuart Binny-te nen pawh an lo khel ho tawh ṭhin.

Tun tournament-ah ball 122 a hma­chhawn tawhah run 141 a vaw chhuak tawh a, match khata run a siam hnem ber ṭum chu run 75 a ni a, MCL tournament lo Mizoram chhunga tournament dangah century pawh vawi eng emaw zah a lo vaw chhuak tawh. Armed Veng lakah hian an innghahna tur pakhat a ni leh dawn a, a chet ṭhat leh chet chhiatin a hril thui ang a, chutihrual chuan a teammate-te theihna pawh hnual suat ngawt theih a ni chuang lo.

Hetihlai hian Qualifier 2 an thlen chhoh thlenga Armed Veng player pawimawh ber tih ngam chu an opening batsman Lalhmangaiha (Amatea) a ni thung. Amatea hi tun tournament chhunga run siam hnem ber dawttu a ni a, a chesual viau a nih loh chuan run siam hnem ber ni turin dinhmun duhawm takah a ding mek. Ball 227 hmachhawn tawhin run 234 lai a vaw chhuak tawh a, half-century (run 50+) pawh vawi nga khelhah vawi hnih ngawt a vaw chhuak tawh. Tun tournament chhunga a run siam hnem ber chu run 79 a ni a, hei hi SCG ground-a match khata mimal run siam hnem ber record dinglai a ni bawk.