Liverpool an hmuhnawm tulh tulh
Thawhṭanni zan khan Liverpool-in khualmualah Swansea City 1-0 in an hneh a, Premier League game 13 chhung chu hneh loh nei loin an kal tluang ta.
Liberty Stadium-a inkhelah Swansea defender Jordi Amat chuan ball clear a tumna lamah Jordan Henderson a per a, mawi taka keeper a khum zui avangin Liverpool lawmah a tla ta a ni.
Inkhel chu
Inkhel an ṭan a, Liverpool aiin Swansea City-in an nawr na zawk. Bafetimbi Gomis leh Gylfi Sigurdsson te'n Swansea tan hlauhawm takin goal-ah pet mah se, Liverpool keeper Simon Mignolet chet ṭhat zan a ni a, ṭha takin a dan sak ve ve. First half-ah goal lut loin hun an khar a, goal chhuah lo Liverpool an vannei.
Second half-ah Liverpool-in an zia tak tak an rawn pholang ṭan a, tun hnaia goal ropui khung ṭhin Philippe Coutinho chuan ṭha takin goal-ah shot mah se Swansea goalkeeper Lukasz Fabianski-a'n ṭha tak thoin a lo dang. Liverpool tlar hma te'n Swansea tlar hnung an chhaih buai chhunzawm a, Swansea player hlui Joe Allen ball pet ṭha tak chu Fabianski bawkin a lo dang.
Minute 64-naah inhliam vanga rei tak chawl tawh captain Steven Gerrard a rawn tlan lut a, game a nung lehzual. Minute 68 naah Liverpool in goal an khung ta nge nge a, goal erawh vanneih goal a ni. Martin Skrtel a through ball chu Daniel Sturridge-a'n lo khawih per zeuhin Swansea defender Amat chuan lo pet chhuah a tum a, tlu chunga pet a nih vangin a ball hian Henderson a per a, Fabianski ban phak loah a goal ta daih.
Hemi hnu hian Sturridge chuan goal post pet per leh mah se Liverpool -in goal dang an thun belh tawh lo a, 1-0 in chak result nen an captain kir zanah an chak ta a ni.
Liverpool hian league game nga chhung a zawnin an chak tawh a, keeper Simon Mignolet hian khualmualah game ruk chhung chu a zawnin goal a chhuah lo, 1966 leh 1972-a an record siam tawh an nih rual chiah.
Liverpool tan League game 13 chhunga an chak vawi 10-na a ni ta a, vawi thumah hian khingpuite nen an inhnehtawk.
Eng nge an sawi?
Liverpool manager Brendan Rodgers chuan, "Second-half-ah khan kan khel ṭha takzet a, chak kha kan phu a ni. First-half kan khelh dan erawhin min ti lawm lo a, kan theihna tak tak kan pho lang lo a ni. Kan rilru puthmang leh kan chak duhna rilru avangin kan chak a, khualmuala game ruk chhung goal chhuah loh hi a ropui em em a ni," tiin an goal venhim danah a lawm thu a sawi.
Swansea City manager Garry Monk chuan, "Hmahruai theihna hun ṭha tak kan nei a, first-half phei kha chu inkhel kan thunun tluan. Mahse, a pawimawh ber goal kan khung si lo a ni. Liverpool khan second-half-ah an nihna tak tak an rawn pholang a, kha khan kan game a tibuai ta vek a ni. Kan khelh dan enin point hlawhchhuah kan phu in ka hria," a ti.