Anfield hmabak Manchester United

Premier League aṭanga Champions League khel tur chinfel a ni lawk dawn lo na­chungin Anfield-a Liver­pool leh Manchester United te inkhel turin thui tak a hril ang. Pathianni zan dar 7:00-ah club inhal tak an inkhel dawn a, a urlawk ṭan der tawh.

United midfielder Michael Carrick chuan, "Player-te'n kan mana­ger-ah rinna kan nghat a, training-naa kan thawh­rah kan hmu mek zel a ni. United hian hmasawn zel turin theih­na kan nei a, City chetsual dan a zirin pahnihnaah kan la awm theiin ka hria. Chu chu kan tum tur a ni. Table kan thlir chuan dinhmun ṭha bik kan awm lo a, Pathiannia Liverpool nena kan inkhel tur hi a pawimawh takzet a ni," tiin a sawi.

Carrick chuan sawi chhunzawmin, "Season tawp lamah chuan thil a danglam thei a, hma kan sawn theih rualin kan tla hniam thei bawk," a ti.

Defender Chris Smalling pawhin Inrinni zana Manchester City an chak zawh loh avangin pahnihna an nih theih thu a sawi ve bawk.

Smalling chuan, "Arsenal nen kan inkarah point khat chauh a awm a, kan chunga awm hi kan la tum dawn avangin dinhmun ṭha zawkah kan awm thei dawn a ni. Manchester United hian season thara Champions League khelh hi kan duh takzet a, Spurs kan hneh kha kan bul ṭanna ni se Liverpool hi kan hmabak inkhel pawimawh chu a ni," tiin a sawi.