Signal Iduna Park-ah Dortmund Vs Juventus

Kum 18 liamta khan Munich-ah UEFA Champions League final khelh a ni a, Borussia Dortmund-in rinkai zawk Juventus hnehin an champion. Khatih hunlai kha Italy ropui vanglai a ni a, Juve-in Zinedine Zidane, Christian Vieri leh Alessandro Del Piero te an kawl nachungin Germany-ah an chak zo lo.

Zaninah Dortmund-in an khelmual Signal Iduna Park-ah Juventus Stadium-a 1-0 an hneh loh Italian champion lehthal an tum dawn, Champions League last 16 second leg hi a ngaihnawm dawn. Thlir duh tan zing dar 1:15 men thlen a ngai thung.

Dortmund-in quarterfinal thleng turin goal an mamawh a, an match hnuhnung pahnih Hamburger leh FC Cologne te an hmachhawn ṭumin goal an khung lo. Bundesliga-ah Dortmund-in chhuan tur an nei lo, match 25 khelh tawhah point 30 an hmu a, hmahruaitu Bayern Munich point hmuh zat chanve pawh an pha lo.

Juventus-in first leg-a Dortmund an hneh hnuah Roma an draw a, Coppa Italia-ah Fiorentina hneh loin an tla. Mahse an insiamṭha tawh a, Sassuolo leh Palermo te 1-0 ve ve in an hneh. Table-ah lah an dinhmun a ṭha a, point 64 an hmu tawh a, anmahni hnaih bertu Roma aiin point 14-in an sang tawh.

Juve manager Massimiliano Allegri chuan, "Dortmund theihna kan hriat rualin him turin goal khat emaw goal hnih emaw chu kan mamawh lawi si. Chuvangin fimkhur takin kan khelh a ngai a, vanneihna kan mamawh tel bawk," tiin an dinhmun la awlsam loh thu a sawi.

Dortmund hian UCL-ah match hnuhnung 14 an khelmuala khelhah vawi 11 an chak thei a, Juventus an hneh thei tih a chiang.

Dotmund manager Jurgen Klopp chuan, "Juve nena kan inkhelh hunah hian a tawp thlenga inkhelh tih hmuhnawm a ṭul em tih ka hre lo. Chutihrualin, a tawp lam thawnthu a ngaihnawm chuan kan la lut theihna tihna a ni ang a, a lawmawm khawp ang. Chak tumin kan khel dawn," a ti.

Klopp hian tun hnaia contract ziak thar Marco Reus leh Shinji Kagawa te chu team tana an pawimawh thu a sawi tel bawk.