Messi penalty hlah City-in hman ṭangkai tum
Etihad Stadium-ah Barcelona-in mualneitu Manchester City an chaih hrep a, a chakna erawh 2-1 chauh a ni. Champions League last 16 first leg-ah Lionel Messi-a'n penalty a khung lo a, inkhelh banah City boss Manuel Pellegrini-a'n Messi penalty hlah vanga beiseina an neih thu a sawi.
Zanin dar 1:15 hian Man City-in Nou Camp an tlawh dawn a, quarterfinal luh theih dan awlsam ber chu 1-0 a chak a ni. Mahse Premier League champion hmachhawn tur hi Barcelona a ni a, a khirh khawp ang. Zanina player hmuh châkawm chu first leg-a Barca tana goal hnih khungtu Luis Suarez leh City goal awmchhun khungtu Sergio Aguero chu English club hmachhuan tur a ni.
Barca an thutak
Pathianni kha Barcelona training schedule-ah chuan chawlh tur a ni a, amaherawhchu player pawimawh Gerard Pique, Javier Mascherano, Jordi Alba, Messi leh Ter Stegen te'n training an ṭhulh lo.
Inrinni zana Eibar hnehtu Barca hian Thawhṭanni aṭang khan squad kimin an training leh tawh. Barca-in inhliam Sergio Busquets leh Thomas Vermaelen tih loh chu City hmachhawn turin an chhawr thei ang.
European champion ṭum li ni tawh Barcelona hian quarterfinal an lut theih a nih chuan a zawna vawi riat an luhna tur chiah a ni. Groupstage-ah khan Catalan club hi Group F-ah awmin an khelmualah hnehna an chang vek a, an hneh zingah Chelsea petchhuaktu Paris St-Germain an tel.
Nou Camp-a English club laka Barca record hi a ṭha khawp mai - vawi 16 an chak a, vawi 11 an draw a, vawi hnih an chak lo. Chumai a ni lo, Champions League bikah first leg-a an chak tawhna match 35 zinga match 33-ah stage sang zawk an thleng.
Beisei nei City
Tun hma chuan Manchester City hi team ṭha zinga chhiar tel an ni ngai lo a, Arab mi hausain an lei hnuah erawh club-in field chhung leh pawnah hmasawnna a hmu a, a kum telin belhchian an dawl telh telh bawk.
Group E-ah FC Bayern Munich leh Roma nen groupstage-ah an awm ho a, match hnuhnung berah Roma an hneh a, harsa takin last 16 an thleng. Tunah chuan quarterfinal thleng turin Spain-ah Barca an hneh a ngai a, a hma aiin a la harsa cheu dawn.
Man City hian Spain-ah Villareal an hneh bak chak an la nei lo a, vawi khat draw neiin vawi li lai an chak lo. Chumai bakah City hian an club history-ah quarterfinal an la lut ngai lo.
City ring lotu Hoddle
England manager hlui Glenn Hoddle chuan, "City-in chak an mamawh a, amaherawhchu Pellegrini-a'n player pahnih hma tawnga a dah chuan ka hlauhthawn pui khawp mai. Chak chu an mamawh ngei a, tum pawh an tum ang, mahse Barca hian an nawr lutuk chuan an vaw let thei a ni. City hian engtin pawhin khel se an tan chuan Barca hi chu an ṭha lutuk hret a ni," a ti.
Nikum khan City hian last 16-ah Barcelona hi an lo hneh lo tawh bawk.