Djokovic a chak zel

Indian Wells third round-ah world number one Novak Djokovic-a'n Albert Ramos Vinolas a hneh hram. British number one Andy Murray-a'n a khingpui German, Philipp Kohlschreiber lakah set khat hloh mah se 6-1, 3-6, 6-1 in a hneh a, last 16 an lut.

Serbian Djokovic hian set khatnaah a service a vawnghim zo lo nghal mah se harsa takin 7-5 in set khatna a la hram. Set hnihnaah Djokovic-a'n harsatna a nei tawh lo a, 6-3 a set lain hnehna a chang.

Murray leh Kohlschrei­ber te hi ṭum thum intumna a ni a, an inhnehtawk thei hle. An inkhelh hasak ber chu kum nga liamta khan Monte Carlo-ah a ni a, Kohlschreiber hi a chak zawk. Nikum France Open khan inhmachhawn lehin set nganaah Murray hian 12-10 in a hneh hram tawh bawk. Kuminah pawh hian a tawpah vannei zawk Murray a chak.

Hmeichhe lamah Maria Sharapova chuan third round-ah Victoria Azarenka chu inkhel inhneh­tawk takah 6-4, 6-3 in a hneh. Sharapova hian set khat­naah hian tihsual a ngah hle a, double foul vawi sarih ngawt a nei a ni. Mahse a tawpah Azarenka service lak sakin a vannei ta a ni.

Inkhel dangah Serbian Ana Ivanovic chu Caroline Garcia lakah 6-2, 5-7, 6-2 in a chak lo. French star Garcia hian last 16 in vaw tling tur hian darkar hnih chuang hret a hmang.