England player-ten hlawh inang la

Brazil-in an ram hmeichhe football team leh mipa team hlawh inang an pek tawh tur thu an puan hnu lawkah Football Association chuan Brazil football kal dan hi an thil kalpui sa reng a nih thu an sawi a, January 2020 aṭang khan England mipa leh hmeichhe team-te chuan ram tana koh an nihin hlawh inang an la. 

England player-te ram tana an khelha an hlawh zat hi puanzar a ni lo a, mahse inelna liana an thlensan dan azira bonus an dawn ṭhin chhiar tel lohin match khatah £2,000 - £3,000 inkar hlawh tura ngaih an ni a, mipa player tan chuan club lama an hlawh nena khaikhinin  it lutuk tham a ni lo - hmeichhe player tan erawh a itawm tham hle thung. 

Hmeichhe footballer hlawh hnem ber nia sawi Ada Hegerberg-i'n kum khata a hlawh hi £343,000 a ni a, hei hian Arsenal midfielder Mesut Ozil-a kar khat hlawh  £350,000 a phak lo - Indian Super League-a player hlawh hnem ber ni mek ATK Mohun Bagan striker Roy Krishna hian chhiah paih hmain £513,000 vel a hlawh!

Women's world champion United States of America player-tenmipa team nena hlawh inang phuta court an pan aṭang khan football khawvela ram tana inkhel mipa leh hmeichhia ten hlawh inang an lak chungchang thlawpna hi a lar chho hle a, England leh Brazil hma hian Australia, Norway leh New Zealand-te chuan he dan hi an lo kalpui tawh. 

US hmeichhe team player-te hi hlawh inang phuta court-a United States Soccer Federation an khinnaah an chak lo zawk a, mahse hei hi khinglet leh turin hma an la mek a ni.