Hockey 5’s Indoor Tournament an zo: Ṭhalaite ruihhlo laka kan fihlim a ngai - Remsiami

Zoliana Royte Memorial Hockey 5’s Indoor Tournament chu Inrinni zan khan a hmawr bawk a ni a, he hunah hian Olympian Lalremsiami Hmar chuan Mizo ṭhalaite infiamna lama thleng sang tur chuan ruihhlo laka fihlim a ngai tih a sawi.

LPS Arena, Falkland-a inelna neihah hian, mipa inelna huangah Kawnpui Hmar Veng chuan FND Boys Hockey Academy chu 7-4 a hnehin an champion a, hmeichhe lamah Hnahthial chuan Thenzawl chu 4-3 a hnehin an champion ve bawk.

Tournament kharna huna khual zahawm Lalremsiami Hmar chuan, "Mizoram Hockey tana Pu Zoliana Royte hmalakna chhunzawm a ni hi a lawmawm ka ti a, ani hmalakna zarah Thenzawl Hockey Acedemy din a ni. Thenzawl aṭang hian Mizoram mai ni lo India aiawh thei mi tam tak chher chhuah an lo ni tawh, a hma lakna a lawmawm takzet a ni.

"Mizoramah a vawi khat nana Hockey khel lai live a ni a, live a pe chhuaktu LPS chungah lawmthu ka sawi. Tournament hian ṭhalaite phurna, tumruhna leh beiseina thar a pek ngei ka beisei bawk.

"Infiamna khawvelah Mizo ṭhalaiten theihna sang tak kan nei a, kan theina tak pho chhuak turin a hmasa berah taksa leh rilru hrisel nih a ngai. Chutiang kan nih tur ang min nih tir thei lotu - zuk leh hmuam bakah ruihhlo lakah ṭhalaite kan fimkhur a ṭul takzet a ni," a ti.

Tournament-ah hian hmeichhe hockey hmunpui Thenzawl, Hnahthial, Lunglei, Champhai, Saitual leh Mamit aṭangin district association team an tel bakah, Durtlang aṭangin team pahnih, Thingsulthliah, Hlimen, Sihphir leh Muthiin team khat an thawh.

Mipa team 18-in trophy an inchuh a, mipa hockey hmunpui Kawnpui khua aṭangin mipa team panga an tel a, Durtlang leh Sihphirin team hnih ve ve thawhin Hlimen, North Lungleng, Sialsuk, Bungkawn, Samlukhai, Thenzawl, Hualngo, Kolasib leh Baktawngin team khat ṭheuh an nei bawk.

Inelna tawp zan hi Home Minister K. Sapdanga chuan a hman pui bawk. UD&PA Minister chuan, "Kan naupan lai chuan Hockey hi Mizoten khawvel kan dai dar theihna turah kan ngai ṭhin, a hnuah football-in a rawn luahlan deuh a, tunah hockey nen ṭha takin a kal dun.

"Jeje Lalpekhlua ten football hmangin Mizoram an tihmingṭha a, chumi hnuah Lalremsiami Hmar-ten khawvel hmuhah Mizo an chawimawi leh bawk," a ti a. Aizawlah chuan khingbai deuh taka hockey khelhna chauh a awm thu leh, khelmual ṭha neih dan ngaituah ṭul a tih thu a sawi bawk.