US Open 2024: Zanin aṭangin New York khawpuiah tennis inelna lian

Tennis season khat chhunga Grand Slam hnuhnung ber US Open chu zanin aṭang hian New York khawpuiah khelh aṭan a ni dawn - India ram aṭanga chuan Thawhlehni zing lampangah Novak Djokovic a inlan ang.

Australian Open, French Open leh Wimbledon an khel zo tawh a, kumin atan chuan major tournament hnuhnung ber a ni dawn. Mipa champion lai Djokovic hian kuminah Grand Slam title a la vaw chhuak lo, tun ṭumah hian nomawi humhim a tum dawn.

Olympic champion

Grand Slam nomawi 24 a nei tawh a, heng zawng zawng ai hian Novak Djokovic chuan Paris Olympic gold medal a lak kha a ngaihhlut thu a sawi a, an ram Serbia tana hlawhtlinna a nih tel avangin a dah pawimawh hi a mak hran lo.

Tun season atan chuan Olympic kha a ngaih pawimawh ber a ni a, a hlen chhuak tawh. Infiamna khawmpui lian hnuah a chawl a, tun ṭumah hian inelna a hmachhawn ve leh dawn chauh, world number 138 Radu Albot lakah chak tura rinkai zawk a ni ang.

Kum 37 mi Djokovic hian tun hnai season sarih chhung chu major title pakhat tal a la ziah, kuminah a record duhawm hi chhawm nun a duh ngei ang, chutihrualin tun ṭum chauh hi hun ṭha a neih tawh avangin a tan kawng a awlsam bik lo mai thei.

A vanglai chu ni se, tournament ṭan hma aṭangin Djokovic chu champion tura rinkai a ni leh nghal ngei ang. Mahse, a kum a tam ve tawh a, tun season bikah phei chuan Olympic champion a nihna bak chhuan tur a la nei lo, kawng harsa a zawh ve dawn.

Australian Open champion Jannik Sinner leh French Open leh Wimbledon title la kawp thei Carlos Alcaraz te chu a elpui hautak an ni dawn. Season hmasa US Open final thleng Daniil Medvedev leh Alexander Zverev te sawi hmaih a thiang lo bawk.

Rinkai Sabalenka

US Open hmeichhe champion lai chu Coco Gauff a ni a, tualchhung nula hian season a hman ṭhat loh avangin tun ṭumah hian rinkai ber a ni dawn lo, a thleng sang a nih chuan atan chanchin lawmawm lam a ni hial ang.

Gauff hian tun hnaiah insiamṭhat tum viau mah se, Canadian Open leh Cincinnati Open khelh zawh takah khan second round leh third round bak a thleng zo lo, atan inelna liana thlen san thut hi thil awlsam a ni dawn lo.

Seeded pahnihna Aryna Sabalenka hi en bik hlawh tur a ni dawn - season hmasa khan US Open final a lut a, kumina inbuatsaih nan Cincinnati Open nomawi a chawi, hard court hi a inkhelh thiamna hmun a nih avangin a buk a rit lo thei lo a ni.

Sabalenka hian Thawhlehnin zingah a match hmasa ber a khel dawn a, Australian nula Priscilla Hon a hmachhawn ang. Australian Open champion vawi hnih a ni tawh a, a vawi thum nana Grand Slam title la turin a boruak a ṭha rih hle.

Belarus nula Sabalenka boruak a len viau lai hian, world number 1 Iga Swiatek chu hmachhawn chakawm lo ber pawl a ni tho. Polish nula hian hard court-a inkhelh a harsat deuh ṭhin a, tun ṭum hi atan insiamṭhat theihna remchang a ni ve bawk ang.