Aston Villa mualah Arsenal an chak

Arsenal chuan Premier League season hmasa lama vawi hnih an ngam lo Aston Villa chu 2-0 in an hneh ta - Gunners tan hian Leandro Trossard leh Thomas Partey ten goal khat ve ve an khung.

Mikel Arteta-a'n defender Jurrien Timber chu inkhel bul a ṭantir a, match hmasa lama a chhawr Oleksandr Zinchenko chu bench lamah a awm thung - hliam vangin Gabriel Jesus chu squad-ah a hmel a lang ve lo.

Inrinni zan Villa Park-a inkhelah Unai Emery enkawl Villa an hlauhawm, mikhual defender Gabriel-a ball hloh kal zelah Villa hian hun ṭha bik an nei, goalkeeper David Raya chauh a hmachhawn tawhah Ollie Watkins chuan goal zawnah a pet lo.

Gunners goalkeeper Raya hian Amadou Onana-a shot a nem phak lo a, goal bar a per - ball per let hi Watkins chuan hnai lutuk aṭangin a lo tauh a, mahse Raya hian a lo dansak leh hman.

Hun tawp dawn lamah Mikel Arteta naute an harh, a tir lama ball hlauhawm neitu Bukayo Saka chuan ball chhuak tawh tura ngaih a al hram a, box chhung hlauhawm laiah dah lutin substitute Trossard chuan a lo khung - keeper Emi Martinez-a'n a dang hman tawh lo.

Goal an neih hnuah Arsenal an phur - a tir aṭanga an goal nawr hlauhawmna ber Saka bawk a fing. England international hian mual sirah ball changin, changtu nei lo Partey a hmu fuh, a ball pek chu Partey hian lo pet nghalin goal kilah a lut.

Arsenal manager Arteta chuan, "Kan tan chuan inkhelh harsatna tak hmun a ni a, hetiang hunah hian rilru paukhauh a ngai zual ṭhin a, thawhhona ṭha bakah mimal che fuh an awm a ngai ṭhin bawk, chutiang chu tun ṭumah khan kan hmu vek.

"Hun pawimawh laiah kan goalkeeper David a che ṭha ṭhin hle, ani khan min chhanhim. A ṭhiante khan ball an en tawp hun te kha a awm hial, khatiangah pawh kha a lo dang hram ṭhin," a ti a, man of the match atana thlan player a fak hle.

Season hmasa khan Arsenal hi khualmuala EPL an khelh hoah vawi thum chiah chak loh an nei, an chak lohna pakhat chu Villa Park hi a ni a, kuminah chuan point thum nen hlim takin Emirates Stadium lamah an haw thei ta a ni.