MFA leh StepOut thawk dun dawn

Mizoram Football Association chuan performance analysis partner atan StepOut thawhpui turin thuthlung an ziak, he thawhhona hnuaiah hian a bul ṭan nan Mizoram Premier League (MPL) khelh lai meka inkhel hmabak zawngte chu Step Out-te hian a zirchianna data an siamsak ang.

StepOut hian video hmangin football zirchian hna an thawk a, MFA nena an inremnaah hian a thlawn vekin MPL inkhelh hmabakte an zirchiang dawn. StepOut hi Netherlands Football Association (KNVB) leh khawvel huapa club lar Ajax te nen pawh an thawk ho a ni.

Awmze nei taka inkhel bihchianna hi India ramah pawh an la kalpui meuh lo. StepOut hmang hian awmze neiin MPL leh Mizo player-te match tina an data leh statistics chiphiar a hriat theih dawn. Coaching staff-te pawhin mumal leh awmze nei zawkin game an zirin an inpuahchah thei ang.

StepOut hmang hian ball possession, shot, pass dik zat, chance siam zat, tackle dik zat, foul zat leh football atana data pawimawh hrang hrang a hmuh theih dawn. MPL-a team enkawltute bakah Mizoram team enkawl turte pawhin an hlawkpui ngei a rinawm a, player che ṭha awlsam zawkin a thliar theih ang.

Mizoram football tan MFA leh StepOut thawk dun hi chanchin lawmawm a ni a, chutihrualin a hlawkna tak tak tel pha tur chuan coach-te pawh an inzir peih a ṭul ngei ang.