Police chelh tumtu Bethlehem

Mizoram Police-in I Day Football nomawi an chawi zawhah inrintawkna an nei let tih a lang a, LZ Juice MPL11-ah Sihphir Venghlun FC 6-0 in an sawp nghal. Police tana chanchin lawmawm chu goal ruk ngawt an khung bakah goal an chhuah lo hi a ni.

Vawiin tlai dar 3:30 hian Police-in FC Bethlehem an hmachhawn dawn a, Lalbiaksanga Colney hote tan dinhmun siamremna hun ṭha a ni thei ang.

Bethlehem hian match hnuhnung berah Aizawl FC chu 6-1 zetin an ngam lo a, result ringawt thlir chuan Police tan hmachhawn an châkawm takzet ang.

Mahse, I Day Football-ah Police hian Bethlehem hi hun tawp dawna goal hnih an khung hmangin 2-1 in an hneh hram tih hriat a ṭha. Hei bakah hian Bethlehem hian Aizawl FC hi first half-ah an dang chat ṭha, tih hriat a ṭha bawk.

Police tana pawimawh ber chu goal khung hma a ni dawn a, chumi tur chuan Malsawmfela, Michael Lalbiaksanga, F. Lallawmkima leh Lalbiakhlua (Biaktea) te an pawimawh dawn. Chutihrualin FCB tan goal venhim a pawimawh dawn a, Lalhriatpuia Sailo hote 'set piece' ven kawngah an fimkhur lehzual a ṭul dawn a ni.