Man United hmalam a 'bright' lo

Premier League match hnihna lekah Manchester United an tlawm nghal a, Brighton & Hove Albion hneh lotu Erik Ten Hag-a hote tan tun season-ah champion beisei ngam a har leh rih dawn.

Amex Stadium-ah Seagulls-in Danny Welbeck hmangin an khung hmasa a, Man United-in Amad Diallo hmangin siphurh sut mah se mualneitu tan Joao Pedro chuan injury time-ah chakna goal a khung ta zawk.

Naupang mahse...

Brighton manager Fabian Hurzeler hi kum 31 mi chauh a ni a, a player zinga mi James Milner hi amah aiin kum sarih a upa zawk. Mahse, Hurzeler-a naupanna hi ngaihnep theih a ni lo a, Premier League match hnihah vawi hnih a chak nghal.

Seagulls hian manager lak an thiam. Chris Hughton thlaktu Graham Potter a hming ṭha a, Potter thlaktu Roberto de Zerbi a che ṭha leh. De Zerbi hi thlak zawh harsa tura ngaih ni mah se match hnih aṭanga thlir chuan Hurzeler hian a la thlak zo hrih hle.

Attacking football

Danny Welbeck-a'n a inzirchhuahna Man United lakah goal a khung fo tawh a, Inrinni zanah pawh Kaoru Mitoma ball pek chu minute 32-naah goal-ah a chantir. Man United-in goal chhuah mah se an khel chhe hran lo. Marcus Rashford hmangin siphurh sutah inngai mah se offside vangin pawm a ni lo a, Mason Mount pawhin hun ṭha a bawhpelh.

Milner pawhin second half-ah goalkeeper Andre Onana dan hman loin pet mah se Diogo Dalot-a'n a pet chhuak hman. Minute 60-naah Noussair Mazraoui ball pek luh ṭha chu Amad Diallo-a'n um lutin a ke vei lamin siphurh sutna goal a khung.

United a khel ṭha chhunzawm a, Amad leh Bruno Fernandes te hmanga Brighton tlarhnung ṭhiatin Portuguese midfielder cross chu Alejandro Garnacho-a'n goal-ah a chantir. Mahse, Garnacho pet hi in sa seng hman lo Joshua Zirkzee-a'n a khawih avangin offside vangin pawm a ni lo.

Team pahnihin chak tumin attacking football an khel ve ve a, a tawpah Brighton an vannei ta zawk. Substitute Simon Adingra cross ball ṭha zet chu Joao Pedro-a'n injury time-ah pawh minute ngaanaah a tauh goal a, Brighton 2-1 in an chak.

Hmabak a ko

Inkhelh banah Man United manager Erik Ten Hag chuan, "Ka player-ten theihna sang tak an nei a, mah se goal hmaah an hriam lehzual a ngai," tiin a sawi. September 1, Pathianni zan hian Old Trafford-ah Man United-in Liverpool an mikhual dawn a, inkhel hmuhnawm chhawp chhuah a ni ang.

Ten Hag hian Ajax a enkawl laiin Feyenoord enkawl ṭhintu Arne Slot a hneh tawh ṭhin a, Premier League-ah erawh chungnung tur zawk hriathiam a har hle. Brighton pawhin anmahni ang bawka match hniha vawi hnih chak thei Arsenal an hmachhawn dawn a, chak 'record' chhunzawm a har ang.