City phurna petu Haaland-a hattrick

Manchester City-in Inrinni zan khan Premier League kai thar Ipswich Town 4-1 in an sawp a, Etihad Stadium-a inkhelah goal khung khawl Erling Haaland-a'n hattrick a siam.

Pep Guardiola hote hian Premier League match hmasa berah Stamford Bridge luhchhuahin Chelsea an hneh tawh a, hemi hma hian Community Shield an chawi tawh bawk. Season ṭantirh chauh la ni mah se Man City bawk hi champion leh tura rinkai ber an ni.

Haaland hattrick

Ipswich Town-in Etihad Stadium-a inkhel entu mipui an barakhaih a, minute sarihna lekah right back Ben Johnson-a ball pek luh chu Sammie Szmodics-a'n um lutin goal hmahruai a khung nghal.

Premier League kai thar an phur a, mahse, a nihna takah chuan goal hmahruai hi Man City chawk phurtu zawkah a ngaih theih. Pep-a hoten siphurh sut turin hun an mamawh rei lo a, player thar Savinho-a'n penalty hlawh chhuak nghalin mintue 12-naah Haaland-a'n siphurh a sut nghal.

Ipswich-in tlarhnung aṭanga ball in pass chhuah an tum a, an hmachhawn hi pressure pe thiam City an ni tlat. Savinho-a'n goalkeeper Arijanet Muric ball chhuhsakin Kevin De Bruyne-a'n goal ruakah a khung a, minute 14-naah 2-1 a ni der.

City-in tha an thlah lo a, minute 16-naah KBD ball pekluh chu Haaland-a'n um lutin Norwegian striker hian laklawh a nei lo - goalkeeper Muric a tlan pel hnuah awlsam hmel takin a khung.

Mualneitu lamin goal khung belh lawk lo mah se minute 88-naah box pawn aṭangin Haaland-a'n a pet goal a, City no. 9-in hattrick a siam. Norwegian striker hian tun season-ah goal li a khung tling der tawh.

City an ṭha

Nipui bazarah Man City-in Julian Alvarez an chan a, Ederson leh KDB hmalam hun a chiang lo. City an buai hman viauin lang mah se Premier League ṭan meuh chuan buaina an tawk leh tawh lo.

Ederson leh KBD ten hmun pawimawh an chang a, treble champion ṭuma captain Ilkay Gundogan chu Barcelona aṭanga laletin Ipwich lakah an inlan. Player thar Savinho a rintlak nghal a, hun rei lote chhungin City winger ṭha bera chhal ngam a ni hial. Euro 2024 best player Rodri tel lo chungin City an chak nuam sa hle.

City striker Haaland-a'n season liam ta khan Premier League-ah goal 27 a khung a, a theihna a san em avangin goal 27 pawh hi 'chauh' tia sawi theih a ni. Haaland hian Premier League season hmasa berah goal 36 ngawt a khung a, tun season-ah pawh a inhliam lo a nih chuan goal 30 chuang a khung leh ngei a rinawm.

Norway-in Euro 2024 an khelh loh avangin Haaland-a'n hahdamna hun ṭha a nei a, inelna hmachhawn turin a inpeih tih khelmuala chet dan aṭangin a lan theih. Pep Guardiola pawhin, "A goal khung theih dan hi a mak zawk a, goal bik thlir chuan Haaland hian Ronaldo leh Messi a elpha ang. Amah hi kan team tan a pawimawh takzet a ni," tiin a sawi.

Haaland hian City tan match 101 chauh la khel mah se goal 94 a khung der tawh a, goal 100 khung turin goal ruk chauh a mamawh tawh. Lionel Messi-a'n Barcelona tana goal 100 khung turin season ruk a mamawh a, Cristiano Ronaldo pawhin Manchester United tan goal 100 khung tling turin season ruk tho a mamawh.