Ramhlun dinhmun hriatna tur Chanmari

Chanmari FC-in I League 3 khel turin ngawrh takin inpuahchahna an kalpui a, LZ Juice MPL11-ah tha an thlah thiang chuang lo. MPL hmahruaitu Lalsangzuala Hmar hote hian vawiin chhun dar 12:30 hian RG Stadium-ah Ramhlun Athletic an hmachhawn ang.

Ramhlun Athletic hian I Day Football-ah semifinal thleng phain MPL11-ah pawh semifinal thlen phak ngei an tum. Danny Lalduhawma hote hian goal khung an thiam a, MPL11-ah pawh goal 15 khung tawhin Chanmari aiin goal ngain an khung tam zawk.

Ramhlun innghahna chu Felix Lalruatsanga a ni a, Serchhip tlangval hian MPL11-ah goal sarih khung tawhin top scorer a ni mek. Season liam ta khan Chanmari FC-in Felix hi an la lut a, I Day Football zawahah chhuahtirin MPL khel tlakah an ngai lo. Mahse, Felix hi beidawng loin khelmualah a thawkrim sawt a, kum khat hnu lekah tualchhung player langsar a ni tawh.

Felix tan vawiin hi Chanmari laka phuba lakna remchang a ni thei a, chutihrualin Lalsangzuala Hmar hote hi team ṭha zawka ngaih an ni. I Day Football-ah khan team pahnih hi an inhmachhawn a, 2-2 in an inhnehtawk avangin Danny Lalduhawma hote hi an indah hniam bik lo ang.

Chanmari pawhin Lalkhawpuimawia an nei let leh tawh a, Kelkang striker hian SYS FC lakah chakna goal a khung nghal. Sanga hote hian I League 3 atana inpuahchah nan August 24, Inrinni zan khan ADFA First Division club Ramhlun North nen friendly match an khel a, 4-0 in an chak.

First Division club hneh hi Chanmari tan inchhuanna tur awm lo mah se player-ten I League 3 khel turin inbuatsaihna an nei tih an hria a, khelhna hmun an inchuh mek. Team chhungah inelna thianghlim a awm chhoh mek a, Chanmari FC tan rah ṭha a thlen tura ngaih a ni.