RFYC Naupang League an ṭan

RFYC Naupang League Season 3 chu August 24, Inrinni khan RG Stadium, Mualpuiah khelh ṭan a ni. Inelnaah hian team 12 - Little Kickers Academy (Mission Veng), Aizawl Grassroot Center 'B', MSSC Football Academy, FC Dawrpui Vengthar, Dinthar YMA, Republic GSA, Grassroot Center 'A', Becks Football Academy, Kanan FC, Durtlang Grassroot Centre, Neuhof School (Chanmari) leh Goals Football Academy (Zotlang) te an awm.

Reliance - MFA project-a head coach K. Lalrindika chuan, "Season thumna a ni ta a, hma kan sawn zel a ṭul. Senior level chauha hrilh tur emaw kan tih, goal venhim laia tawm khawm (compact) thiam leh goal nawr laia khelmual hman zauh thiam te kan ngai pawimawh dawn. Technique chu a pawimawh reng a, chutihrualin inkhelh dan hmang pawh kan thlak hret hret a ṭul a, coach-te tana workshop kan buatsaihah pawh kan zir tam ang," tiin Vanglaini a hrilh.

Naupang League-ah hian team tin hi category panga Under 6, Under 8, Under 10, Under 12 leh Under 14-ah te an inel a; season khatah team khatin match 33 zel an khel dawn. Thla ruk chhunga zawh tum a ni a, school chawlh laiin an khel ṭhin ang.