Champions League hun a inher chhuak Paris-ah Edinson Cavani a kir dawn

Europe-a football inelna sang ber UEFA Champions League chu zanin aṭangin en tur a awm leh dawn. 

Group H-ah Paris Saint-Germain, Manchester United, RB Leipzig leh Istanbul Basaksehir te an awm khawm a, zanin dar 12:30 hian Paris-ah French champion-in Ole Gunnar Solskjaer-a hote an mikhual ang.

PSG-in season liam ta khan Edison Cavani contract an pawhseisak lo a, Portugal-a khelh mini tournament-ah pawh a inlan tawh lo. Uruguayan striker hian Manchester United a pan a, Covid-19 vanga inkhung hran hnuin Pathianni khan training a zawm tawh a, a club hlui a hmachhawn thei dawn.

Paris St-Germain hian season hnuhnung pariatah vawi sarih Ligue 1 nomawi an chawi a, club neitu Qatar Sports Investments lamin an duh ber chu French champion nih leh lam ni loin Champions League nomawi a ni. 

Europe manager langsar Carlo Ancelotti, Laurent Blanc leh Unai Emery te an hlawhchham hnuah Thomas Tuchel a rawn lang. German manager Tuchel hian Champions League nomawi la chawi lo mah se season liam ta khan final an lut a, Europe club lian zingah chhiar hmaih theih an ni lo.

PSG hi tun season-ah bul ṭan ṭha loin Lens leh Marseille lakah tlawm nghal mah se match hnuhnung pangaah an chak zawn leh tawh a, goal khung pawh an uar leh ta hle. Kartawp khan an thiampuipa Neymar tel loin Nimes 4-0 in sawp thei a, hemi hma hian Angers chu 6-1 zetin an sawp.

Manchester United nen an inkhelh hunah World Cup qualifier khelh vanga hahdamtir Neymar an chhawr leh thei tawh dawn. Barcelona forward hlui hian Peru lakah hattrick a siam a, Neymar (64) hian Brazil tana khung tam lamah Ronaldo (62) lehpelin Pele (77) chiah a tluk ta lo. 

Pound maktaduai 200 man Neymar ringawt hi buaipui tham a tling a, a thlawptu Kylian Mbappe hi pound maktaduai 163 man niin French forward ṭhatzia sawi nawn a ngai tawh lo.

PSG ṭhatzia sawifiah dan awlsam chu Man United player pawimawh ni ṭhin Ander Herrera bench-ah a awm a, English club lakah pawh chak tura rinkai zawk an ni ang.

 United number 7 ha tur Edison Cavani hi French champion-in hnawl tawh mah se Uruguayan striker hi PSG tana goal khung tam ber record chelhtu a ni a, goal 200 tehmeuh a khung.

El Matador hming lem an pek Cavani-a'n French club tana a goal khung zat hi Mbappe (94) leh Neymar (72) te khung zat belh khawm aiin a tam zawk.

Mbappe chuan, "A hmalam hun atan duhsakna ka hlan a, chutih rualin team dangah a awm tawh. Kan zinga mi a ni tawh lo a, kan hmachhawn dawn a, hneh kan tum ang," tiin khelmualah inṭhian ṭhatna a awm loh thu a sawi.

Cavani bakah hian United player thar Alex Telles leh Facundo Pellistri te pawh an la inlan lo a, PSG nen hian an inlan kher dawn em, tih erawh a chiang lo. Uruguayan striker inkhelh hnunun ber chu kumin March 11-a PSG leh Borussia Dortmund inkhel kha a ni a, match fitness a la nei lo!

Ole Gunnar Solskjaer chuan kartawpa Newcastle United an hneh zawhah, "Season a inṭan," tiin phurna thar an neih thu a sawi a, St James' Park-ah an khelh ṭhat rualin ngaihtuah ṭhat tur erawh a tam. Hrem vangin Anthony Martial an chhawr thei lo a, amaherawhchu French forward aia khel Marcus Rashford a khel ṭha hle.

Juan Mata leh Daniel James ten Man United tana bul ṭan tlak an nihzia an pholang leh tawh a, Newcastle United nen an inkhelh ṭum hian Paul Pogba leh player thar Donny van de Beek te bench-ah an awm. Squad-a awm lo Mason Greenwood chhiar tel phei chuan Norwegian manager tan duh thlan tur a awm nual.

Chutihrualin tlarhnung lam erawhin United ṭantute thin phu a tirang khawp ang. Goal venhim kawnga sawisel kai lo ber Aaron Wan-Bissaka lah cross a thiam lo! Defender manto Harry Maguire leh a kawppui Victor Lindelof leh Eric Bailly-te bakah Luke Shaw leh keeper David de Gea thlengin chet sual chang nei vek an ni. 

Hei vang hian UCL match pawimawh ni mah se, Shaw aiah United tana la khel miah lo Alex Telles hmu duhtu an tam a rinawm hle.