Hansi Flick-a Barca an kal zel

Cham tura an hmin vek hnuah coach Xavi an ban a, Hansi Flick an la lut - tun thleng chuan Barcelona-in an la tifuh a, German coach enkawlna hnuaia an league match hmasa pahnihah an chak nghal.

Catalan club hian an match hmasa bera 2-1 a Valencia an hneh hnuin Athletic Bilbao chu 2-1 in an hneh ve leh a, result ṭha an hlawh chhuak zel - chutihrual chuan goal an chhuah tel ve zel erawh ngaihtuah chian a ngai.

Barcelona tana Lamine Yamal-a goal hmahruai khung chu Athletic Bilbao hian Oihan Sancet-a penalty hmangin chhanglet mah se, Robert Lewandowski chuan second half-ah goal khung ve lehin, 2-1 in Barca an chak.

Nizan khan Barca elpui leh ber tura ngaih champion lai Real Madrid leh Atletico Madrid an inlan a, he thu buatsaih a nih lai hian an result kan hre hman lo.

Hello, Yamal

Euro-ah a kum zat awihawm loh khawpa hmuhnawmin Yamal a tal vel a, nomawi a chawi. Season ṭan a ni a, Yamal a pangngai reng - match hmasa zawkah pawh goal khung lo mah se, a che vel chu hmuhnawm a tling a, Valencia tlarhnung tan a hnawksak hle.

Bilbao lakah pawh kum 17 mi forward hi buaipui thamin a khawsa leh a, an mikhual tlarhnung tan thin thia awm a theih loh! Minute 24-naah Yamal hian box pawn aṭangin mawi zetin goal hmahruai a khung a, he nau zet hi chu a thiam thlawt a ni.

Barca fans thawm a ring a, awlsam taka chak tura inngaihna a lian hman. Mahse, an coach hlui Ernesto Valverde enkawl team hi an beidawng duh lo - chawlhlawk hmain, Barca centre back Pau Cubarsi chuan penalty a chawi.

Kum 17 mi Cubarsi hian box chhungah Bilbao player Alex Berenguer a titlu a, referee-in penalty spot a kawk. Kum 24 mi Oihan Sancet chuan inringtawk taka petin, keeper Marc-Andre ter Stegen rin lohna lamah a chhuih lut.

Chhandamtu Lewy

1-1 in chawlhlawk hman a ni a, second half ṭan hnuah pawh goal an khung lawk theih loh avangin Barca fans an hlauthawng hman hle. Mahse, a hunah tak Lewandowski a inlar a, Polish striker hi a la tar lo tih a lang nawn.

Pedri-a ball cross chu goalkeeper Alex Padilla-a'n a lo dang per a, a per lehlam hi kum 36 mi striker hian hnai set sawtah a lo khung - Lewy goal khung hian minute 75 a ni tawh a, Barca fans tan chuan thawk huaina tham a ni.

Lewy hi a vanneih zan ni se, goal tam zawk khung thei a ni. Goal a khung hma hian vawi hnih ngawt post a tihper a, a ṭum fuh loh zan a tawng dawn em ni aw, tih mai tur a ni a, mahse, a hunah tak chakna goal a khung.

Match hmasa zawkah, Valencia laka 1-0 a an hnufual khan Lewy hian goal hnih a lo khung tawh bawk a, tun season-ah league goal thum a khung ta der. Bayern Munich-a a vanglaia a pu hlui Flick hnuaiah Lewy a vul leh mek e.

Barca an buai

Tun season-a an league match hmasa pahnihah Barca an chak nghal a, fans tan result lawmawm a ni. Hetihrual hian Catalan club hi a sum dinhmun erawh a la ṭha hleithei lo a, tun thlengin an player lak thar Dani Olmo an la ziak lut thei lo.

Barca hian La Liga dan hnuaiah an sum dinhmun an la chingfel thei lo. Euro maktaduai 60 man Olmo an ziah luh theih nan hian an player hlawh hnem zinga mi, German midfielder Ilkay Gundogan chu Manchester City lamah an kaltir tawh.

Mahse, Gundogan an chhuahtir hnuah pawh Olmo an la ziak lut thei lo a, striker Vitor Roque chu hralh dan tur an ngaihtuah leh mek. Brazilian striker hi Real Betis nen sawizawm a ni a, he thuziak i chhiar meuh chuan an in la lut fel tawh hial mai thei.

Barca hian La Liga hnuaia 'squad cost limit' tih chu an zawm theih nan captain Sergi Roberto leh full back Julian Araujo an chhuahtir tawh bawk a, an inchingfel mek zel.