An dan ngai tein Leverkusen!

Bayer Leverkusen thawnthu a danglam thei lo - Zirtawpni zan khan an league match hmasa berah 3-2 in Borussia Monchengladbach an hneh a, chakna goal hi hun pek belh minute 11-naa an khung a ni!

Season hmasa khan Leverkusen hian league leh German Cup-ah tlawm nei miah loin season an khar a, hun tawp lama an 'comeback' fo vang tiin a sawi theih - season hmasa ṭan tir aṭanga chhiarin inelna hrang hrangah match 12-ah hun pek belha chakna goal emaw draw-na goal an khungna chiah a ni.

European top five league-ah hun pek belha heti zat draw-na emaw chakna goal khung tam lama anmahni hnaih bertu aiin goal liin an khung tam! Zirtawpni zan inkhelah hian Leverkusen tan Granit Xhaka leh Florian Wirtz-ten first half-ah goal hnih an khung a, 2-0 a ni.

Champion lai hi awlsam taka chak mai tur angin an lang hman a, mahse, Gladbach hian second half-ah Nico Elvedi leh Tim Kleindienst hmangin si phurh an sut a, Kleindienst-a'n si phurh sut zawhna goal a khung hian minute 85-na a ni tawh.

Team pahnih hi point an insem mai a rinawm tawh a, mahse, Wirtz chuan an ze pangngai chhuahin, hun pek belh minute 11-naah chakna goal a khung a, point thum nen German champion hi an haw leh ta zawk.

Leverkusen boss Xabi Alonso chuan, "Tlai taka goal kan khung leh ṭhin hi sawifiah thiam pawh a har zawk. Zir theih a ni lo a, player-te thinlunga ka tuh theih pawh a ni lo. Tlawm duh lohna thinlung kan neih vang ni berin ka hria," a ti.

Hetihlai hian coach thar Nuri Sahin hnuaia an league match hmasa berah Borussia Dortmund chuan 2-0 in Eintracht Frankfurt an hneh a, Jamie Bynoe-Gittens chuan goal hnih a khung. Nizan khan Bayern Munich inlanin, an result kan hre hman lo.