Spurs-in Everton an sawp

Tottenham Hotspur dik tak kan hmu leh ta - an league match hmasa bera an chak zawh loh hnuin London club an insiamṭha a, an mikhual Everton chu 4-0 ngawtin an sawp. Champion tum khel ang a nih leh ta zaih e!

Spurs tan Son Heung-Min chuan goal hnih khungin, Yves Bissouma leh Cristian Romero ten goal khat ve ve an khung bawk a, Everton-in a chhanletna tur an neih loh avangin kut ruakin London an hawsan.

Ange Postecoglou enkawlna hnuaia khel Spurs-in na takin an nawr nghal a, minute 14-na lekah Bissouma chuan Dejan Kulusevski-a siamsak chu chiang zetin goal-ah a chantir nghal - Bissouma hi tun hnaiah khelmual pawna a chet dan mawi lo tak avangin club hian an hrem.

Mahse, Rodrigo Bentancur hliam vangin Everton lakah bul ṭan a ṭul a, a pu rinna chu goal hmangin a chhanglet. Minute 25-naah captain Son-a hun a inher chhuak a, Everton goalkeeper Jordan Pickford-a tihsual nangchingin an goal hnihna tur a khung.

Spurs hian an la duhtawk lo cheu. Second half-ah Romero chuan James Maddison-a corner aṭanga ball kal chu a tauh lut a, minute 77-naah Son chuan a hnu a khar - Micky van de Ven-a'n ṭha zeta ball a tlan luhpui hnua a pek chu South Korean striker hian Pickford-a kap karah a khung a, 4-0 in Spurs an chak.

Everton erawh an league match hmasa berah 3-0 ngawta Brighton & Hove Albion an ngam loh hnuin, Tottenham lakah 4-0 in an tlawm leh ta a, coach Sean Dyche-a'n a hna chân loh a duh chuan a insiamrem a ṭul ang.

Tottenham boss Ange Postecoglou chuan, "Kan khelh danah ka lawm a, kan tan chuan a phurawm takzet. Hei hi kan tawpna tur a ni lo a, a ṭha thei ang bera khelh zel kan duh a ni," a ti a, a naute khelh dana a lawm thu a sawi.