Parma lakah Milan an tlawm

AC Milan chuan tun season Serie A match vawi hnih an khel tawh a, chak ni hmel an la hmu lo. Inrinni zan khan Milan hian an mikhualna ramah Parma chu 1-0 in an hneh lo.

Mualneitu Parma hian minute hnihna lekah Dennis Man hmangin goal hmahruai an khung, second half-ah Christian Pulisic chuan Rafael Leao thawhrah sengin si phurh a sut.

Milan hian goal an hum rei thei lo, goal an khung aṭanga minute 10 hnu lekah goal an chhuah leh zui - Matteo Cancellieri chuan Parma goal hnihna a khung a, team lian leh ṭha zawk Milan lakah kai thar Parma an chak.

Paulo Fonseca-a enkawl Milan hi an match hmasa zawkah Torino nen 2-2 in an inhnehtawk a, match hnih an khelh tawhah point khat chauh an la hlawh chhuak tihna a ni a, insiamṭhat an mamawh hle.

AC Milan coach Fonseca chuan, "Goal kan venhim theih loh dan kha sawifiah a harsa, tlarhnung siamṭhat kan ngai hle a ni. Parma khan min nawr apiangin a hnung lam kha kan nghing dual zel a ni ber mai," a ti.

Hetih lai hian Inter Milan erawh an chak - Italian champion hian Matteo Darmian leh Hakan Calhanoglu te goal hmangin Lecce chu 2-0 in an hneh a, an match hmasa zawkah chak zo lo ve tho mah se an insiamṭha nghal tih a takin a lang.

Inter manager Simone Inzaghi chuan, "Genoa lakah pawh khan ṭha takin kan khel a, goal hnih kan chhuah erawh kha chu a pawi. Tunah pawh ṭha takin kan khel leh a, point thum hlu tak kan hlawh chhuak thung a ni.

"Keini chu Inter Milan kan ni a, hnehna chan chak leh champion chakin kan tuihal reng tur a ni. Season hmasa lama kan champion tawhna ringawt kha a tawk lo, tun season-ah a thara kan chet a ngai," tiin a sawi.